SHILLONG: Ma·mongo Bharatiya Janata Party (BJP)-chi dilenggipa National Democratic Alliance (NDA) sorkari, Meghalaya a·dokna simsakjaenga ine Voice of the People’s Party (VPP)-ni president Ardent Miller Basaiawmoit-ni matnanganiko Meghalaya a·dokni BJP jegalataha.
BJP-na ku·wattimgipa Mariahom Kharkrang-ni parakatani gitade, VPP president-ni agangipa mitam kamrangkode ua ra·chakna man·aia indiba Meghalaya a·dokna ma·mong sorkari simsakjaenga ine agananide kakket ong·ja aro ra·chaknaba man·gijagipa ong·a.
A·songo nambatsranggipa a·dok ong·na gita Meghalaya, minggittam cholrangko galaha ine Basaiawmoit-ni agangipa kattarangni gimin janapatengon, uni agangipa gipin kattarangkode ua ra·chakna man·aia indiba Meghalaya a·dokna ma·mong sorkari simsakjaenga inakode ua raken jegala ine Kharkrang parakataha.
Article 371-ara, Meghalaya gita dake chonchongipa a·dokrangko chel·chakna nangchongmotgipa niam ong·a indiba ian namroro silroroaniko ra·baani cholde ong·ja ineba ua talataniko on·angaha.
“Chel·chakna dongimin niamrang, jekai Article 371 ba Sixth Schedule-mangmangchide namroro silroroaniko ra·bana man·jawa,” ine BJP-ni dilgipa aganaha.
Assam aro Meghalaya a·dokni simarango meligrikna man·jaenggipa biaprangni gimin janapatengon, ia meligrikna man·jaenggipa biaprangko skangonin namatna man·genchimoba ia jolrangode namroro silroroaniko bang·e ra·bana man·kujawachim ine Kharkrang aganaha.
Iandakgipa meligrikgijanirangko namatna man·janiara Meghalaya a·doko namroro silroroani cholrangkode champengsrangenga ong·ja ineba ua aganaha.
Meghalaya a·doko ong·telaigipa cholrang bang·genchimoba, a·dokna namroro silroroaniko ra·bana man·chipkuja ine VPP president-ni agananikode ua ra·chakskaaha.
Meghalaya a·dokna simsakjaenga ine matnanganiko jegalatengon, dingtang dingtang namroro silroroani scheme-rangko aro dingtang dingtang cholrangko on·anichi ma·mong sorkari, Meghalaya a·dokna bang·en dakchakanirangko on·aha ine BJP-na ku·wattimgipa parakataha.
Meghalaya sorkariko BJP diljaengoba aro sorkarini baksan ong·engoba, a·doko namroro silroroaniko ra·bana gita ma·mongo BJP-chi dilenggipa NDA sorkari, pangnan dakchakanirangko on·jringenga ine ua aganaha.
“Ma·mong sorkaride a·dokna namroro silroroaniko on·drana man·ja. Kamkode a·dok sorkarionisa a·bachengna nanggen aro uni ja·mansa ma·mong sorkaride dakchakanirangko on·aigen,” ine Kharkrang parakataha.
