Baghmara Civil Hospital-ko nambate chalaina chanchirima
BAGHMARA: South Garo Hills a·jao chagrongna nangenggipa dingtang dingtang neng·nikanirangko namatna aro manderangni nanganirangko chu·sokate on·na gita Mongolbar salo a·dokni Chief Minister Conrad K Sangma, dingtang dingtang department-ni official-rang aro dingtang dingtang dolni dilgiparang baksa Baghmara Circuit House-o tom·aniko ong·atangaha.
Baghmara Civil Hospital-ko chalaianio doctor-rang aro gipin kam ka·giparang chu·ongjae neng·nikanirangko chagrongna nangtokengani gimin ia tom·anio mongsongbate hospital-ko nambate chalaiani bidingo Chief Minister chanchirimdilangaha.
Baghmara Civil Hospital-na specialist doctor-rangko donatmanahachim indiba da·o dipet specialist doctor-rangoni saksaba kamtangko jako ra·ekujaengani a·sel kamrangko name ka·na man·kujaenga ine ia tom·anio official-rang, Chief Minister-na talate on·aha.
Official-rangni talatani gitade, Baghmara Civil Hospital-na specialist-rangko man·chape gimik sak 22 doctor-rangko nangenga indiba da·o dipet sak 11 medical officer-rangsan hospital-o kamko ka·engani gimin doctor-rang chu·ongkujaenga. Unbaksana ia hospital-o nurse-rang, biomedical-ni kamko ka·giparang aro gipin kam ka·giparangba chu·ongjaenga ine official-rang, Chief Minister-na parakataha.
Baghmara Civil Hospital-ko da·o nambate taridapengahani gimin hospital-o blood storage unit aro operation theatre-koba chalaina man·engaha ineba official-rang aganaha. Ia hospital-o Sewage Treatment Plant (STP)-koba tarina a·bachengataha aro ia STP-ko antigittam ba antibrini gisepon matchotna ka·dongenga ineba official-rang parakataha.
Baghmara Civil Hospital-na nangdapkuenggipa nurse-rangko aro gipin kam ka·giparangko ta·raken gapatchina gita ia tom·anio Chief Minister, official-rangna ge·etaniko on·angjolaha. Hospital-o maming neng·nikani gri chirangko sokate on·china gitaba Chief Minister ge·etangaha.
Simarangko kapengna ra·gipa a·ani korosrangko gamani bidingo chanchirimangengon, iani bidingo ua Home Affairs Ministry baksa agangrikgen ine Chief Minister ku·rachakaniko on·angaha.
Baghmara Stadium-na a·arangko ra·ani bidingo chanchirimangskaengon, a·arangko ra·anio chagrongna nangenggipa neng·nikanirangko ia antini gisepon namatchina gita Chief Minister, official-rangna ge·etaniko on·angaha.
Ia tom·anio a·dokni Chief Secretary Shakil P Ahammed, South Garo Hills a·jani Deputy Commissioner Sumit Singh aro dingtang dingtang department-ni official-rangba bak ra·angaha.
