BAGHMARA: South Garo Hills a·jani headquarter Baghmara-o Counter-Insurgency & Anti-Terrorism (CIAT) School aro Integrated Police Welfare Complex-ko Mongolbar salo, a·dokni Chief Minister Conrad K Sangma-ni jakchi kulie on·angaha aro ia nokrangko kulie on·anganio, a·dokni Deputy Chief Minister Prestone Tynsong, Education Minister Lahkmen Rymbui, Director General of Police (DGP) Idashisha Nongrang, a·dokni Chief Secretary Dr Shakil P Ahammed aro dingtang dingtang official-rangba dongpae bak ra·angaha.
Ia tom·anio a·dokni Chief Minister, jinmana aganprakangengon, Baghmara-o CIAT School aro Integrated Police Welfare Complex-ko kuliahani gimin Home aro Police Department-rangna an·tangni namgipa skaniko parakangaha.
Ia project-ko a·dokni Inspector General of Police (IGP) Davis NR Marak-sa, an·tangni SP ong·engmiting somoio, kulina gita chanchidilchengaha ine parakatengon, ia project-ko a·bachengatna gita niksamsoani, miksongani aro on·kangani gnang kamko ka·dilahani gimin uko Chief Minister mittelpilangaha.
Ia project-na nangdapkuenggipa tangka paisarangko chame on·ahani gimin ua dingtangmancha a·dokni gitcham Home Minister aro da·o Education Minister ong·enggipa Lahkmen Rymbui-koba mittelpilangaha.
Ia CIAT School aro Integrated Police Welfare Complex-ko chanchisamsogipa biapo rikaniara, Meghalaya Police-ni sipairangnasan ong·aigija, India aro gipin a·songrangoni officer-rangnaba training-rangko on·na nambegipa biap ong·enga ineba Chief Minister aganaha.
Ia biaprangara, a·songni simao ong·e, diltugipa aro ga·nanggija biaprang ong·ani gimin counter-insurgency aro anti-terrorism school-na nambegipa biap ong·enga ineba Chief Minister parakataha.
CIAT School aro Integrated Police Welfare Complex-ko kuliani bidingo jinmana talataniko on·angengon, ian a·dokni police dolrangna dingtangmanchagipa training-rangko on·e, chel·chakani kamrangko namdapatan baksana police-rangna aro uamangni nokdangrangna, uamangni kamrango pangchake, dingtang dingtang cholrangko on·na kuligipa ong·enga ine Chief Minister parakataha.
Ia nokrangko kulie on·angani somoio jinmana aganprakanggipa gipin manderangara, a·dokni Deputy Chief Minister Prestone Tynsong, a·dokni DGP I Nongrang, a·dokni Chief Secretary Dr Shakil P Ahammed, Inspector General of Police (IGP) Davis NR Marak aro gipinrang ong·a.
