SHILLONG: Re·baenggipa February jani skanggipa ba gnigipa antini gisepon, sak 3000 sipairangko ra·dapna siengahani gimin Meghalaya Police, bilakbatatako man·na siengaha.
Official-rangni u·iatani gitade, Meghalaya a·dokni pilak a·jarangon, police station, outpost aro battalion-rango sipairang chu·ongjaengani gimin sak 3000 sipairangko ra·dape, bangbang ong·e dongenggipa kamrangko gapatgnok.
Iani bidingo u·iataniko on·angengon, Meghalaya Police-o sak 3000 sipairangko seokani kamrang da·o matchotangengaha aro Eastern Range-na Shillong-o aro Western Range-na Tura-o interview-rangko apsan ra·enga ine Home (Police) department-ni Commissioner & Secretary Cyril VD Diengdoh parakataha.
Ia sak 3000 sipairangoni sak 76 sub-inspector (SI)-rangkode adita salrangna skangsan kamo ra·aha aro da·o ia sak 76 SI-rangna, North Eastern Police Academy-o training-ko a·bachengengaha.
Gital sipairangko Meghalaya Police-ni Armed aro Unarmed branch-rango donatgen aro ia gital sipairangna February jani gisepon appointment letter-rangko on·e, dingtang dingtang gadango rimnapgen.
Ia sak 3000 sipairangko ra·dapengahani gimin Meghalaya Police-o sipairang chu·onggijaniko namatna dakchakgnok aro police-rangni kamrangko ka·anio nambate ka·na man·gnok ine Diengdoh parakataha.
Official-ni parakatani gitade, a·doko drugs jakkalani aro badingsrukaniko champengna sorkari raken kamko ka·engani gimin Anti-Narcotics Task Force (ANTF)-koba bilakbatatgnok.
