SHILLONG: A·dokni Chief Minister-na Officer on Special Duty (OSD) saksniko rakkianio, 2019 bilsioni gimik gong kror gittamna baten tangka paisarangko koros ka·na nangaha ine Manbhalang Phankon minggipa mandeni Right to Information (RTI) ka·e man·aniko songbadrango parakatani ja·man, ia OSD-rangko kam rakkiani bidingo Hynniewtrep Youths Council (HYC), a·dok sorkariko sing·doataha.
“Ia OSD-rangko darangnaba u·iatgijasa kamo rakkienga aro uamangni dormaharangna aro dingtang dingtang man·gnirangko on·na manderangni tangka paisarangkosa jakkalenga. Ian a·doko songdongenggipa manderangna ra·chakna man·gijani ong·a,” ine HYC-ni president Roy Kupar Synrem parakataha.
Chief Minister-ni OSD-na rakkienggipa manderangni qualification aro gisik nanganirangko sing·doatengon, “Ia manderangara sawa, uamangni poraiani gadangrangara mai aro sani namgnina uamang kamko ka·enga?” ine Synrem sing·doataha.
MDA sorkari ba Chief Minister, manderangni tangka paisarangko an·tangtangni skatang koros ka·e rona man·ja ine janapatengon, OSD-rangni daitoko manderang name ma·sikujaengon, indita tangka paisarangko iandakgipa official-rango koros ka·engani gimin a·dok sorkariko HYC, raken jegalataha.
“Manderangni tangka paisarangara, lekka pora, an·seng baljokani, rama jal·langrangko tariani, kamrangko nakatate on·anisa ong·a aro iandake dilgiparangni skatang koros ka·e roani gam-jin ong·ja,” ine Synrem parakataha.
Chief Minister-na rakkigipa OSD-rang pilakni bidingon jinmana talate on·chinaba HYC dabiangaha aro iandake manderangni nangnikanirangko knachakjagenchimode jingjengatanirangko dakna ka·mikkenataniko on·angaha.
RTI ka·e man·aniko Phankon-ni parakatani gitade, Chief Minister-ni OSD-rangko contract basis-o kamo rakkiaha aro ia OSD-rang, sakprakan japrako gong lak 1 ka·e dormahako man·aha.
2019 bilsioni ia saksni OSD-rangna dormaha on·ani gong 1,68,12,785 gapaha ine RTI-na aganchakanio parakaha.
Unbaksana, 2019 bilsioni sakgittam OSD-rangna Travel Allowance (TA)-ko gamani gong 1,49,93,374 ong·aha ineba ma·sina man·aha.
OSD-rangna bilsiprako dormahamangmangko on·anion badiaba lakrang gapaha ine janapatengon, Chief Minister-ni office (CMO)-o IAS, MCS, IPS aro MPS officer-rangko man·chape dingtang dingtang sorkari official-rang dongmanahaon maini gimin indita sak OSD-rangko rakkina nangaha ine Phankon sing·doataha.
Meghalaya a·doko Public Administration aro International Relations gita dakgipa kamrango skia man·gipa chadamberangan kamrangko man·gija dongna nangengon, ia OSD-rangko rakkiani giminba ua sing·doataha. OSD-rangko rakkianio indita tangka paisarangko koros ka·ani pal, chadamberangna kamrangko aro janggi tangani cholrangko ong·katate on·na man·pilgenchim ineba ua parakataha.
