TURA: National Highway (NH-127B) ramako tarina ra·gipa a·ani tangka paisarangko gamchipkujaengani a·sel a·a nokgiparang noksan ong·na nangenga ine All Meghalaya Minority Students Union (AMMSU) parakatenba, a·a nokgiparangna ta·raken a·ani tangkarangko gamchina sorkariko didiataha.
Iani bidingo, West Garo Hills a·jani Competent Authority for Land Acquisition (CALA) aro Deputy Commissioner-na sedoatengon, ia ramana a·arangko ra·na skanggipa survey ka·chenganio, mitam manderangni bagan barirang, nok aro dokkanrang, pakmarang, chiakolrang, mi a·palrang aro gipin gam-jinrangko name segatjaha aro ia gam-jinrangna tangka paisarangko hisapanio watchanggalaha ine AMMSU matnangataha.
A·a nokgiparang aro dingtang dingtang dolrang changni chang mol·moltaitaiani ja·man official-rang, survey-ko ka·taiaha aro skang watchanggalgipa gam-jinrangko name nipiltaienba segataha ine janapatengon, indake ong·genchimoba, ia a·arangna da·alona kingkingan tangka paisarangko gamkuja aro a·a nokgiparangna maming u·iatanirangkoba ba talatanirangko on·kujaenga ine AMMSU parakataha.
Indake ong·engon, gnigipa survey ka·a matchotani ja·man, maini gimin da·alona kingkingan compensation-ko gamkujaenga talataniko on·china aro tangka paisarangko on·na gita somoirangko tik ka·e on·china AMMSU didiataha.
