AMPATI: Re·baenggipa April 10 tariko Garo Hills Autonomous District Council (GHADC) election-ko ong·atna siengani gimin South West Garo Hills a·jao licence gnang silchidare jakkalenggipa pilak manderangkon, election-na skang an·tangtangni silchidarerangko sorkarina pakwatchina, South West Garo Hills a·jani District Administration u·iataha.
Arms Act 1959-ni Section 17 ning·o ia u·iataniko on·angengon, South West Garo Hills a·jao licence gnang silchidare jakkalenggipa pilak manderangan, an·tangtangni silchidarerangko ta·raken sepangbatgipa police station ba authorized armoury-na pakwatechina ine SWGH a·jani District Magistrate aro District Election Officer Anendya Raajsshre, ge·etaniko on·angaha.
Ia silchidarerangko, election matchotkujaskal aro election-ni result-rangko parakkujaskal sorkarini ning·on dongen ineba District Magistrate parakataha.
Ia ge·etaniko manijagenchimode, Arms Act 1959 aro gipin niamrangni ning·o rakgipa sastirangko man·ani cholrang donga ineba South West Garo Hills a·jani District Magistrate, mikrakataniko on·angaha.
