SHILLONG: Umroi-o donggipa Shillong Airport-o dal·kalgipa sildorengrangko onchongatna man·na gita airport-ko dal·batate tarina a·arangko breani kamrang matchotmanaha ine Mongolbar salo, a·dokni Deputy Chief Minister aro Transport Minister Sniawbhalang Dhar, Assembly-o parakataha.
Assembly-o sing·anirangna aganchakaniko on·angengon, da·o dipet Shillong airport-ni runway, metre 1829-san ong·aiani gimin ia airport-o ATR-72 aircraft-rangkosan jakkalkuenga indiba ia airport-ni runway-ko bakrodapatahaode, iana bate dal·kalgipa sildorengrangkoba ra·bana man·gnok ine Dhar aganaha.
“Shillong Airport-ni runway-ko metre 2400-ona bakrodapatna gita a·dok sorkari, Airports Authority of India (AAI) baksa Master Plan-ko tarimanaha,” ine Deputy Chief Minister aganaha.
Shillong Airport-ko dal·bate tarina gimik acre 22 a·arangko bredapna nangaha ine janapatengon, ia acre 22-oni acre 11.75 a·arangde ramram manderangni aro acre 10.3-de Defence-ni a·arang ong·a ine Transport Minister parakataha.
Dhar-ni parakatani gitade, private a·arangko Ri Bhoi a·jani Deputy Commissioner, 2026 bilsini January 28 tarikon, compensation-ko man·chape gong kror 72.17-na bremanaha aro da·o ia a·arangko AAI-na pakwatna siengaha.
Defence-ni a·arangko breani gimin janapatskaengon, 2025 bilsini April 17 tariko Defence Ministry, Advance Working Permission-ko on·aha aro Umroi Madan songni acre 7.7255 ong·gipa a·arangko gong kror 23.55-na breaha ine Deputy Chief Minister parakataha.
“Defence official-rang baksa ia 2026 bilsini March jao Memorandum of Understangding (MoU)-o soi ka·grikanggen,” ine Dhar aganaha.
