DADENGGRE: Bal Vivah Mukt Bharat Campaign ba bilsi sokkugijagipa bi·sarangko bia ka·ataniko champengna ja·ku de·ani bak gita West Garo Hills a·jani District Legal Services Authority (DLSA), Meghalaya State Legal Services Authority (MSLSA) baksa nangrime, National Legal Services Authority-ni dakchakanichi, Mongolbar salo, jinma re·jomaniko Selsella C&RD Block-o ong·atangaha.
Ia re·jomaniko Selsella Government Upper Primary School-oni a·bachenge, Balachanda-chipakna ong·atangaha aro ia re·jomanio, DLSA-ni official-rang, chatro chatrirang aro gipinrangba bak ra·angtokaha.
NALSA ASHA Standard Operating Procedure (SOP) aro Bal Vivah Mukt Bharat Campaign-ni ning·o December 4 tarikoni March 8 tarikona dingtang dingtang biaprango ong·atengani gimin ia rally ba jinma re·jomanikoba ia program-ni bak gitan ong·atangaha.
Jinma re·jomaniko a·bachengna skang, Tura-ni Assistant Legal Aid Defense Counsel Jingjang Ch Marak, jinmana aganprakengon, ia program-ni gamchataniko talate on·angenba, bi·sarangko, mongsongbate me·chik bi·sarangko bilsi sokgija bia ka·atanichi bi·sarangni janggi tanganio nangchakeanirangko aro namgijanirangko agan-talate on·angaha.
West Garo Hills a·jani a·kawe jolrango bi·sarangko bia ka·atanirang batengani gimin ia jolrango songdongenggipa manderangna bilsi sokkugijagipa bi·sarangko bia ka·atanichi mai dakgipa nangchakeanirangko ra·bana man·a, uarangni bidingo mikrakataniko on·a ia jinma re·jomaniko ong·atangaha.
