TURA: Je manderangan re·baenggipa April jani 10 tariko ong·atna sienggipa Garo Hills Autonomous District Council (GHADC) election-o susana miksongengachim, uamang pilakan an·tangtangni Scheduled Tribe (ST) certificate-ko on·telna nanggen ine GHADC-ni Executive Committee (EC) u·iataha.
Chief Executive Membor (CEM)-ni soi ka·gipa lekkao u·iatani gitade, adita salrangna skang GHADC-ni Executive Committee, tom·e chanchirimangenba, GHADC election-o susana sienggipa candidate sakantian Meghalaya a·doko songdongkamgipa Scheduled Tribe ong·a ine sakkiko on·china, GHADC election-o ST certificate-ko nangtelgipa ong·atna tik ka·angaha.
Ru·uta bilsirangonin Garo Hills-ni dingtang dingtang dolrang, GHADC election-o Tribal ong·gijagipa manderangni susaaniko aro bak ra·paaniko jegaltokengachim aro uandaken da·o GHADC-ni Executive Committee, GHADC election-o susana sienggipa candidate-rangna ST certificate-ko nangtelgipa ong·ataha.
Ia u·iataniko on·angengon, Indian Constitution-ni Sixth Schedule ning·o, Garo Hills-o songdongenggipa Tribal-rangni daka rikani aro a·a-chiako chel·chakan baksana an·tangari sason ka·na gita miksonganiosa GHADC-ko on·aha ine GHADC-ni CEM parakataha.
“Uni gimin da·ontal GHADC-ni General Election ba By-election-o susana gita candidate sakantian, Meghalaya sorkarini on·gipa ST certificate-ko mesokna nanggnok,” ine Executive Committee-ni u·iatanio parakataha.
Candidate-rangni nomination file ka·anio ST certificate-rangko on·chaptelna nanggen aro nomination-rangko nipilani somoioba candidate-ni Tribal ong·aniko ST certificate-an sakki on·gen ineba GHADC-ni Executive Committee u·iataha.
“GHADC-ni ning·o pilak Returning Officer-rang aro Assistant Returning Officer-rangan nomination lekkarangko nipiltaiani somoio ST certificate-rangko nina nanggen. ST certificate-ko on·jagenchimode ua candidate-ni nomination ba susana on·gipa lekkarangko jegalna man·gen,” ine EC-ni ge·etaniko on·anio parakataha.
Indake ong·engon, GHADC election-o ST candidate-rangkosan susana on·na gita Executive Committee tik ka·ahani gimin Tura-ni MDC aro BJP-ni state vice president Bernard N Marak, an·tangni kusi ong·aniko parakataha.
“Ian ru·uta bilsirangoni dabienggipa ong·a aro GHADC election-o ST candidate-rangkosan susana on·na da·alo tik ka·ahani gimin anga namen kusi ong·a. GHADC-ni ia ja·kuko de·ahani gimin chinga mittelna ska,” ine Marak parakataha.
