SHILLONG: Badiaba badiaba biaprango mitam police-rang, manderangko ka·saninggija dake mesoka aro skatang kattarangko aganrongani a·sel manderang kenna nangronga ine badi ka·anirangko man·ahani gimin police-rangna training on·ani bewalrangko dingtangatna tik ka·angaha.
Iani bidingo talataniko on·angengon, badiaba badiaba biaprango mitam police-rang, bil-jak mesoke manderangko kenatronga ine manderangni badi ka·anirangko man·soahani gimin police-rangna training on·ani bewalrangko nipiltaina sorkari tik ka·aha ine Sukrobar salo, a·dokni Deputy Chief Minister aro Home (Police) Minister Prestone Tynsong, Assembly-o aganaha.
Assembly-o sing·anirangna aganchakaniko on·angengon, police-rangna dongimin training-rang donga indiba police-rangna namgipa dakbewalrangkoba skie on·na gita sorkari, training on·ani bewalko namdapatna miksongenga ine Tynsong aganaha.
“Chinga training-rangko on·jringenga aro manderangni police-rangna kenanirangkoba DGP-na u·iatronga. Basakobade manderang, police-rangko nikon kene kataia,” ine Deputy Chief Minister aro Home Minister Tynsong aganaha.
Ong·gija dakgipa manderangde police-rangna kene kata indiba ramram manderangni police-rangna kenanide dingtang a·selni giminsa ong·enga ineba ua aganaha.
“Iani bidingo chanchirimna jotton ka·on maini gimin ramram manderang police-rangna kenna nanga, anga an·tangba ma·sija. Haida ian badiaba badiaba biaprango police-rangni ong·gija dake mesokani giminan ong·engnaba gnang,” ine ua aganaha.
Police-rangna dingtang bewalo training-ko on·anichi, police-rangko manderang baksa melina aro salantini kamrango dakchakna skigen ineba Home Minister parakataha.
“Police-rang maiba case-rangko jako ra·engon, skanggipa knatimnaba nanggen aro manderangna dakchakanirangko on·na skaniba dongna nanggen,” ine Tynsong aganaha.
Police-rangna namgipa ‘bewalrangko’ skie on·gen ine sorkari ku·chaka
Date:
Share post:
