TURA: Garo Hills-o bading chiwale cha·paenggipa manderangoniko aro dingtang dingtang garirangoniko niam gri tangka gile ra·engani a·sel bading chiwale cha·enggipa manderang noksan ong·na nangtokenga ine Niksamso Garo Community Organisation (NGCO) parakatenba, niam gri tangka gile ra·aniko dontongchina didiataha.
NGCO-ni parakatani gitade, Garo Hills-ni pilak biaprangon police outpost-rango, badiaba badiaba department-rango aro dingtang dingtang NGO-rangba, bading chiwalgiparangoniko aro commercial garirangoniko niam gri tangka gile ra·enga aro iani a·selan bading chiwalgiparang noksan ong·na nange, bosturangni damrangkosa rakbatatskaenga.
“Garo Hills-ni dingtang dingtang outpost-rango chonchone bading chiwalgiparangoniko aro gari salruragiparangonikoba tangka gile ra·enga ine chinga koborrangko man·soaha. Niam gri iandake badiaba department-rang, organization-rang ba dingtang dingtang dolrangni, tangka gile ra·aniara niamni a·palo ong·a aro ra·chakna amgijani ong·a. An·ching Garo Hills-ni bading chiwalgiparang aro garirangko sale cha·enggiparang, an·tangtangna janggi tangnasa neng·bee tangka paisarangko kamaipaenga indiba uamangoniko iandake niam gri tangka paisarangko gile ra·aniara, uamangni janggi tanganio neng·nikaniko ra·badapani gita ong·enga,” ine NGCO parakataha.
Badiaba department ba NGO-rang, iandake bading chiwalgiparangoniko aro gari sale cha·enggiparangoniko niam gri tangka paisarangko gile ra·a ong·ode, uamangni kosako rakgipa ja·kurangko de·na nanga ineba NGCO, a·dok sorkariko didiataha.
