TURA: North Eastern Hill University (NEHU) Tura Campus-ni skigipa, Professor Kailash Chandra Biswal-ko Shillong songjinmani Mawlai Bypass-o dolsa manderangni kragija dake dokanina NEHU Tura campus-ni chatro chatrirang, skigiparang aro kam ka·giparang raken jegalataha.
Koborko on·ani gitade, ia a·sel ong·ani March-ni 2 tariko ong·aha aro ua somoio ia skigipa, Shillong-oni Tura-ona re·bapilengachim.
Prof Biswal-ara, Management Department-ni professor ong·a aro ua da·o Tura campus-ni registrar in-charge dakeba kamko ka·engachim.
“Prof Biswal-ko kragija dake dokanina chinga NEHU Tura Campus-ni jong-ada no-abirang, raken jegalenga. Skigipako iandake dokaniara, bida budi on·ram biaprango rakkina nanggipa gun, mande ra·ani, naljokani aro mikkimko pe·ani gita ong·a aro iandakgipa kamko chinga ra·chakna man·chongmotja,” ine NEHU Tura campus-oni parakataha.
Skigiparang, chatro chatrirangna a·gilsakni seng·aniko aro bida budiko on·na gita an·tangtangko on·kange kam ka·engon, mitamrangde somoini kri office-ni kamrangkoba ka·na nangao ga·aka indiba skigiparangni kosako iandakgipa kamrangko ka·aniara lekka pora on·anio skigiparangko mande ra·gijani ong·a ineba NEHU Tura Campus-ni chatro chatrirang, skigiparang aro gipin kamrangko ka·giparang parakataha.
Mikkangchi iandakgipa a·selrang ong·taijana gita dos dakgipa manderangni kosako rakbatsranggipa ja·kurangko de·china gitaba NEHU Tura Campus didiataha.
