GHADC-ni ra·gatgimin niamko ta·rake Guv-ona watatchina ASPF dabia

TURA: Garo Hills Autonomous District Council (GHADC) election-o susana gita Scheduled Tribe (ST) certificate dongna nanggen ine Executive Committee (EC)-ni ra·gatgipa niamko a·dokni Governor ra·chakkujaengani a·sel Garo Hills-o so·sojengjeng ong·anirang batroroenga ine A·chik State People’s Front (ASPF) parakatenba, ia niamko ta·rake pass ka·na man·na gita a·dokni Governor-ona watdoatchina a·dok sorkario dabiangaha.
ASPF-ni parakatani gitade, Tribal manderangni niam reti, a·a-chia aro daka rikanirangko chel·chakna gitasa Indian Constitution-ni Sixth Schedule ning·o Autonomous District Council (ADC)-rangko bikotaha aro District Council-rango maiba niamrangko ra·gaton, ia niamrangko nipiltaie ra·chakna gita a·dok sorkari, a·dokni Governor-ona watatna nangronga.
“Ian carpet ning·o salnape donchengna man·aigipa ba ja·mano dakna man·aigen ine dona man·gipa niam ong·ja indiba Tribal-rangna on·gimin jakgitelani aro bilsa ong·ani gimin iako gisiko nange aro kakket ong·e jako ra·na nanggipasa ong·a. Ia kamko ru·utatchae donganide District Council-rangni jakgitele chalaianio rama champengani gitasa ong·enga. Indake ong·genchimoba, GHADC-ni ra·gatgipa niamko a·dok sorkari, Govenor-na watatgija donchipengani a·sel da·alo Garo Hills-o manderangni ding·chaoanirangko nikna man·roroengaha,” ine ASPF-ni general secretary Bernita Marak parakataha.
Meghalaya a·dokni Chief Minister Conrad K Sangma, saksa A·chik a·songni depantean ong·ani gimin Garo Hills-ni manderang, jatna kamko ka·gen ine ka·dongsotokahachim indiba da·alo ong·enggipa obostarangara, uni jatna kam ka·aniko mesokani pal, politics-ni gita kam ka·na skanikosa mesokani ong·aha ineba ASPF matnangataha.
“A·dokni Chief Minister ong·e ua, jattangni manderangna on·gimin bil aro niam retirangko rakkina ja·ku de·jaenga ong·ode sawa dakdilgen? Dilgipa ong·e ua politics-kosan niaina nangja indiba jatni namgninaba ka·donge ja·kuko de·na nanga,” ine ASPF-ni general secretary parakataha.
GHADC-ni ra·gatgipa niamni bidingo a·dokni Chief Minister aro a·dok sorkari maming ku·rangko on·jaengani a·selan manderangni gisepo ding·chaoanirang batroroengaha ineba ASPF parakataha.
“Uni gimin ia kamko ka·sine ka·e roaigija GHADC-ni ra·gatgipa niamko Indian Constitution-ni Sixth Schedule-o on·gimin niamrango pangchake ra·chakna man·na gita a·dok sorkari ta·raken Governor-ona watdoatna nanga,” ine ASPF dabiangaha.