TURA: Re·anggipa March-ni 11 tariko, Tura-ni Araimile-o so·sojengjeng ong·engmiting somoio saknaa man·gipa Pantera M Marak, da·o namkalengaha aro uko Tura Civil Hospital-o sanne banne da·o General Surgery Ward-ona apjitataha ine West Garo Hills a·jani Deputy Commissioner u·iataha.
Koborko on·ani gitade, re·anggipa March-ni 11 tarik attamo, Tura-ni Araimile-o so·sojengjeng ong·engmitingo ia mande, uni jakra jakpong, jakrani ja·sku aro be·enni gipin bakrango adita mata bu·anirangko man·ahachim aro uko rang·sanan Tura Civil Hospital-ona sanna bananiko on·na gita rimbaaha.
Tura Civil Hospital-ni doctor-rang uko ta·raken niroke, una nanggipa sana bananiko on·aha aro uko ICU-o nambate nirokna man·a gita donaha. Da·o una maming kenani dongjahani gimin re·anggipa March 13 tariko General Surgery Ward-ona apjitataha ine Deputy Commissioner u·iataha. Ua da·o ka·sine namrorobaenga aro doctor-rang uko nirokjringengkua ineba DC u·iataha.
Indake ong·engon, kakket ong·gijagipa kattarangko giproroatjachina sakantikon mol·molatenga maina indake dakachi manderangna kenani aro jajrenganiko ong·ata ine Deputy Commissioner parakataha.
