SHILLONG: State BJP-ni vice president aro Tura MDC Bernard N. Marak, a·doko niamgri songdongenggiparangni gimin aganengon, “Bharatiya Janata Party (BJP), Garo Hills-o niamgri songdonggiparangko rikgalgen, uamangni dongani a·selan a·doko songdongengiparangna kechakani ong·pilenga’ ine aganaha.
‘Niamgri napsrukbae songdonggiparang uamangni chong·mot bewalrangko mesokaha, Garo Hills-ni manderangko uamang ra·bipilenga aro ka·mikkenatenga ine Marak, matnangaha.
‘Niamgri songdonggiparangsa a·doko songdongkamgipa manderang baksa apsangrik bil rengsiko man·pana dabienga unbaksana tribal institution-rango bakrimpana jotton ka·enga, iako ra·chakna man·teljawa.’
Tribal ong·gijagipa manderangni tribal instituion-o bakrimna jotton ka·aniara a·doko songdongkamgipa manderangni a·a-chi, cha·ani-raingani bewalrang, ku·sik agananirang, daka-rikani bewalrangko ra·sekna ba gimaatna ra·biani ong·a ineba Marak agandapaha.
Bang·a non-tribal-rangan a·doko dongkamgiparang ong·ja, uamang tribal a·a nokgiparangni a·ako para on·gipaosa dongenga ine janape, Meghalaya High Court-ni on·gipa raini gimin aganengon, Marak, indine aganaha, “court-oba Paragraphs8 aro 128-ko man·gope adita niamrangko taridapna nangnikaniko janapaha. Political dolrangsa an·tangtangni namgnirangna niamrangko jakkalsretaha.
Iarangni gisepon Marak, sorkariko politics-ko gale Garo Hills-ni tribal manderangni bil rengsiko chelchakna gita kam ka·china mol·molaha.
