SHILLONG: Garo Hills Autonomous District Council (GHADC) election-o susagipa candidate-rangna Scheduled Tribe (ST) certificate-ko nangtelgipa ong·atchina manderang nangnikengani gimin manderangni nangnikaniko GHADC-ni gital Executive Committee (EC) chu·sokate on·na nanga ine kam watanggipa Chief Executive Membor (CEM) Albinush R Marak parakataha.
Marak-ni parakatani gitade, GHADC election-o Tribal ong·gijagipa manderangni bak ra·paaniko champenganiara Tribal-rangna on·gimin bil aro daka rikanirangko chel·chakna mongsonggipa daito ong·enga aro GHADC-ni gital EC, candidate-rangna ST certificate-ko nangtelgipa ong·atanichi manderangni nangnikaniko chu·sokate on·na nangenga.
GHADC-ni sak 21 MDC-rang, uni kosako No-Confidence Motion-ko dakna skangan Sombar salo Marak, an·tangni CEM ong·aniko watangahachim ine nikna man·a.
GHADC election-o susagipa candidate-rang ST certificate donggiparang ong·na nanggen ine February-ni 17 tariko Marak, u·iataniko on·angahachim indiba uni iandake u·iataniko gipin MDC-rang jegalskaenba, ia u·iataniko on·na skang, gitcham CEM, Council-o ba MDC-rangni gisepo chanchirimchengjaha ine matnangtokahachim. CEM-ni u·iataniko Meghalaya High Court-ba den·galataha.
Ia u·iataniko on·ani ja·man, GHADC election-na nomination file ka·ani skanggipa salon, Garo Hills-ni dingtang dingtang biaprango so·sojengjeng ong·na a·bachengaha aro ia so·sojengjeng ong·anganio komibeoba mande sakgni sina nangaha aro bang·en manderang saknaanirangko man·na nangtokaha.
Iandake obostarang ong·angani ja·man sak 21 MDC-rang, Marak-ni kosako ka·dongani dongjaha ine No-Confidence Motion-ko dakna March-ni 14 tariko a·dokni Governor-ko didieaha aro iana Sombar salo Special Session-ko ong·atchina a·dok sorkari ge·etaniko on·angaha.
Indake ong·genchimoba, GHADC-ni Special Session-ko ong·atna skangan Marak, CEM-ni kamko wataha aro uni ja·man GHADC-ni MDC-rang, Naguapara-ni MDC Dhormonath Ch Sangma-ko gital CEM-na seokskaaha.
