SHILLONG: Ma·mongni Home Minister Amit Shah, adita salrang skangsan Garo Hills-o ong·anggipa golmalko niamgri napsrukbagiparangni a·selsa ong·a, niamgri napsrukgiparang Garo Hills-ni me·chikrangko kime ba bia ka·e Garo Hills Autonomous District Council (GHADC)-ko a·kangna ba ra·sekna jotton ka·enga ine aganaha.
Assam-ni election rally-o bak ra·e aganprakmitingo Amit Shah, indine aganaha, “Meghalaya-ni Garo Hills-o jolni sontol me·chikrangko bia ka·enba niamgri napsrukgiparang GHADC-ko ra·sekna jotton ka·enga.”
Iarangni gisepon Home Minister, Indian National Congress-ko nisan ra·e Assam-ona niamgri napsrukgiparangko gapata ine matnangaha.
GHADC election-ko ong·atna skang Garo Hills-o golmal ong·e so·sojengjeng ong·angani gimin Amit Shah, ia kattarangko aganaha. GHADC-ni election-ko gipin jatrangni bak ra·aniko champengna jotton ka·anio golmal ong·angaha.
West Garo Hills-ni Chibinang aro gipin jolrang golmal ong·e bilongen so·sojengjeng ong·aha. Golmal ong·ao sakgni manderang siaha aro tom·tomaniko rakkina gita curfew-ko ra·gatna nangaha. Unbaksana mobile internet service-ko dondipataha aro Army aro gipin chelchakgipa dolrang bang·en wataha.
Golmal ong·ani gimin GHADC election-ko ra·doataha. April 10 tarik 2026-o ong·atna tik ka·ahachim.
Indake ong·engon golmal ong·a ja·man election-ko ra·doate GHADC, special session-ko ong·ate election-ko susana gita Scheduled Tribe certificate-o nangtelgipa dakataha.
Amit Shah, Garo Hills-o golmal ong·ako napsrukgiparangni gimin ong·a ine agana
Date:
Share post:
