RONGJENG: East Garo Hills a·jani Rongjeng C&RD Block ning·o donggipa Boldil Government Aided LP skul nok namsrangjahani a·sel skulo poraienggipa bi·sarang aro skie on·enggiparangba neng·nikanirangko chagrongna nangtokenga.
Gabil Boldil songara, Rongjeng-oni km 20-mang chel·ao donggipa song ong·a aro ia songona dakanggipa ramarang namen ga·nangjani gimin ia songona chakka samgni donggipa aro 4 wheel donggipa garirangsan re·na man·aia. Wachini somoirangode ia songona chakka samgni donggipa garirangba re·na namen neng·nikanirangko man·na nanga.
Boldil Govt Aided LP skulko 1998 bilsio kulichengaha aro ja·mano ia skulko SSA-ni gadangona ra·doataha. Ia skulko SSA-ni gadangona ra·doatahaoba, maming namdapanirangko nikna man·jaha aro ia skulko kulichengaonin taridape on·anirang dongjae, da·o skulo poraienggipa bi·sarang aro skigiparangba neng·nikanirangko chagrongna nangtokengaha.
Ia skulko kulichengonin taridape on·ani dongjani a·sel ka·sinsin ia skul nok nosto ong·na a·bachengaha aro ia skul nosto ong·roroangahaon ja·mano ia skul noko do·ga kelkirang dongjae, songni mitam manderang churangkoba ringchakna a·bachengaha.
Kobor on·timgiparangni u·iatani gitade, ia skulni mongsonggipa building-o do·ga, kelki aro nokkingrangba dongjaha aro nokni a·paba nosto ong·ahani gimin ia skul nokko waknolrang gitasa nikpilaiaha.
Ia skulo skigipa sakgni skie on·enga aro ia skulo songo donggipa te 51 nokdangrangoni sak 50-na baten chatro chatrirang poraienga ine kobor on·timgiparang parakataha.
Skangode ia skulo kuturi ge·gni dongachim indiba ia kuturirang nosto ong·tokahani gimin da·o ia skulko bi·sarangna Mid-Day Meal on·chakgipa babilsiosa ka·skana nangengaha ineba kobor on·timgiparang parakataha.
“Kuturi namkala dongjahani gimin chinga babilsiona jitna nangaiaha indiba ia kuturiba namen apchona aro ia kuturion skigipa sakgni, class ge·dokni chatro chatrirangko class ra·na nangenga,” ine skulni headmaster parakataha.
Ia skul nokni obostako skangonin uamang dingtang dingtang dilgiparangna aro sorkari official-rangna u·iatengachim indiba da·alonan darangba ia skul nokko taripile on·na gisiko nangjaenga ineba headmaster parakataha.
Ia skulo poraianggipa chatro chatrirangoni mitamde matric, class XII aro graduate ong·anggiparangba dongaha ineba skulni headmaster, an·tangni kusi ong·aniko parakatskaaha.
