Ampati: Garobadha Police Investigation Centre (PIC)-oniko Police Out Post-ona tangonatna mejamangmang chanchianina A’chik State Peoples’ Front (ASPF) raken jegalaha, iako skang gita dake donpilchina aro ge·etgipako ra·galpilchina authority-rangko mol·molangaha.
South West Garo Hills-ni Superintendent of Police-na chitti see on·gipao ASPF ja·ku de·gipani bidingo ning·tuen janape seataha, jekon April 8 tariko press-o nakatatanichi parakataha. Chanchi ja·ku de·gipako manderangni gisepgriko suk ong·gijaniko gimikan parakangaha aro niam riti-o ka·donganiko iachin on·chepe ra·gen, ine organisation talatangaha.
Minggipin, Garobadha PIC-oniko Police Outpost-ona tang·doataha ine kobor ra·timgiparangna police-ni gita parakataha.
Garobadha-ni namgnina chanchina nanggipani bidingo ASPF kan·dike talatangaha, ua biapo donggiparang bang·a neng·nikanirangko chagronga jekai manderangni niam riti-na aro chel·chakanina nangchapgipa mamlarang ong·a. Centre-ni gadangko tangonatanichi police-rangni kam ka·aniko bilgriatgen aro manderang chu·ongjae outpost-o name kam ka·na man·jawa aro neng·nikgipa somoio mamlarangko nirokangna am·sandianirangko dakna man·jawa, ine ASPF aganaha.
Manderangni nang·nikani batrikrikenggipako kam ka·e on·a man·a gita sentre-oni chu·gimik police station-ona tang·doatnasa nanggen ine uamang gisiko nangbate aganangaha aro ia chanchianiko bon·atna ja·ku de·gipa dake organisation talatangaha. Ja·ku de·ani kam ka·aniko bon·atna bikotgipa ong·gen aro ua biapo police-rangni kam ka·aniko dal·e ra·gija dake ga·akenga ine uamang aganaha.
Authority-rang ta·rake tangonatna ge·etgipako ra·galchina aro Investigation Centre dapilchina aro chu·gimik police station dakna nambatgipa ja·kurangko de·china ASPF didiangaha. Indakgipa chanchianirangko dakna skang joltangni stakeholder-rang baksa nambatgipa agan-ku·pattianiko ra·chengchina dol didiangaha.
