SHILLONG: Da·o dipet Bharatiya Janata Party (BJP), Meghalaya a·doko manderangni chakpaanirangko bang·e man·kujaengoba 2028 bilsini Assembly election-ode bang·bate seat-rangko chena man·gnok ine a·doko BJP-ko dilenggipa manderang, ka·dongchakenganiko parakataha.
Iani bidingo kobor ra·timgipa manderang baksa agangrikengon, 2028 bilsini Assembly election-o nambate dakna BJP ka·dongenga aro komibeoba seat dam 10-kode chena nisan donenga ine BJP Meghalaya-na ku·wattimgipa Mariahom Kharkrang parakataha.
2028 bilsini Assembly election-na BJP, ka·sinsin kamrangko ka·na a·bachengengaha ine janapatengon, da·o re·baenggipa bilsigni ataonide uamang kamrangko bilakbatatgnok ine Kharkrang parakataha.
Garo Hills Autonomous District Council (GHADC) election-ni bidingo janapatskaengon, ia election-na BJP, adita sak candidate-rangni bimingkode parakatmanaha aro election-ni bidingo sorkari parakatahaon, GHADC-ni pilak constituency-rangon susana kamrangko a·bachengatgen ine Kharkrang aganaha.
GHADC election-ko April-ni 10 tarikon ong·atna tik ka·ahachim indiba batanggimin sal somoirango, Garo Hills-o so·sojengjeng ong·ahani a·sel ia election-ko sorkari dontongatchengahachim. GHADC-ni term-koba a·dok sorkari, April 18 tarikoni a·bachenge, jadokna ra·dodapataha.
Indake ong·engon, Assam-o ong·atanggipa Assembly election-oba BJP, chepiltaienba sorkariko rikpiltaigen ine Kharkrang, an·tangni ka·dongchakenganiko parakataha.
Batanggimin bilsirango BJP sorkari, Assam a·doko ta·raken namroro silroroaniko ra·bana man·ahani gimin Assam-ni manderang, BJP-ko namniktokaha ineba ua aganaha.
Assam a·doko indita bilsirangna gitcham sorkarirangni matchotchipgijagipa kamrangko BJP sorkari, batanggimin bilsi 10-15-ni gisepon chu·sokatna man·aha ineba ua aganaha.
2028 election-o bang·bate seat-rangko chena man·gen ine BJP ka·dongenga
Date:
Share post:
