SHILLONG: Shillong songjinmani Lower Lumparing-o Muslim-rang, niam gri masjid-ko rike olakkienga ine matnangenba, ia masjid-ko Mongolbar salo, Khasi Students Union (KSU) Laban circle-ni membor-rang chipe donataha.
Ia masjid-ko chipatani bidingo talataniko on·angengon, ia masjid, jekon Muslim-rang, Lumparing Masjid ine see donahachim, iako jolni dilgiparango sing·chenggijasa kuliahani gimin uamang, ia masjid-ko chipe donataha ine Mongolbar salo, KSU Laban circle-ni president Shiningstar Chyne parakataha.
“Gittimoniko ba nangchakegipa official-rangoniko permission ra·chenggijasa Muslim-rang, ia biapo masjid-ko rikaha aro ian niamni a·palo ong·a,” ine Chyne parakataha.
KSU-ni parakatani gitade, ia biapko Muslim-rangni gopramko nirokenggipa chowkidar-ni nok daknasa on·ahachim indiba uamang, ia biapo olakkiram nokosa rikskaaha.
Ia masjid-o kam ka·enggipa Imam-koba KSU-ni membor-rang, niam gri dongenga aro Islam-ko skiprakenga ine matnangenba, ia biaponi re·angchina ge·etaha.
Ia biapo masjid-ko rikani gimin badi ka·anirangko man·soani ja·man Lower Lumparing-ni dorbar shnong, ia biapko nina re·angenba, ia masjid-ko pe·e galna tik ka·ahachim indiba masjid-ko nirokenggipa manderang maming ja·kurangko de·chipjaha ineba KSU Laban circle-ni president parakataha.
“Ia masjid-ko ra·galchina gita uamang bakan sorkari official-rango badi ka·doanggen,” ineba Chyne parakataha.
