Jowai Bypass-ko tarianio niam pe·anina PWD-ni Chief Engineer-ko lak 31 dai gamchina ge·eta

SHILLONG: West Jaintia Hills a·jani Jowai Bypass Road project-o samtangtango ong·telaigiparangko chel·chakna dongimin niamrangko pe·ani gimin Meghalaya State Pollution Control Board (MSPCB), Public Works Department (PWD)-ni Chief Engineer (NH)-ko lak 31.25 dairangko gamchina ge·etaniko on·ataha.
Iani bidingo, New Delhi-o donggipa National Green Tribunal (NGT)-ni Principal Bench, Sombar salo hearing dakna sienga.
NGT-ni ge·etanio pangchake songgipa Joint Committee-ni nirokeanio, niam pe·anirangko nikna man·ahani gimin dairangko gamchina MSPCB ge·etaniko on·angaha. MSPCB-ni Member Secretary George Hagi Chyrmang-chi dilenggipa committee, ja·ku de·ani report-ko April-ni 24 tariko Tribunal-na on·angaha.
Tribunal-ni mikkango affidavit ka·ani gitade, ia 2026 bilsini February 23 tariko Jowai Bypass nirokeon, NH-40E aro NH-44 ramako tarianio, samtangtango ong·telaigiparangko chel·chakna dongimin niamrangko pe·aha ine March-ni 23 tarikon MSPCB-ni Chairman R Nainamalai, PWD-ni Chief Engineer (NH)-na u·iatahachim.
Ia niamko pe·aniara, Water (Prevention and Control of Pollution) Act, 1974, Air (Prevention and Control of Pollution) Act, 1981, aro Environment (Protection) Act, 1986 baksana NGT aro Central Pollution Control Board (CPCB)-ni ge·etanirangko manija gita ong·aha ineba affidavit-o janapataha.
Iani bidingo Jowai-ni saksa Khroo L Pariat minggipa mandeni badi ka·ani ja·man MSPCB, sandirokenba, niam pe·anirangko nikna man·aha. Ia Jowai Bypass ramako tarianichi, samtangtango ong·telaigiparangna nangchakeaniko ra·baenga ine Pariat, badi ka·doangahachim.
Ia mandeni badi ka·doangani gitade, ia ramako tarianichi, Jaintia Hills-o mongsongbatgipa chibima Myntdu chibimako nosto ka·a gita ong·engachim.
Ia Myntdu chibimara, Jowai samba jolo donggipa Mihmyntdu-oni a·bachenge, Jaintia Hills a·jani wilwila gita jokangenba ja·mano Bangladesh a·songona jokangenggipa chibima ong·ani gimin ian Jaintia Hills-ni manderangna namen gamchatbegipa chibima ong·a ine ua badi ka·anio parakataha.
Chibima baksa nangdimegipa a·brirango rama tarianichi aro Myntdu chibimao moilarangko galengani a·selan ia chibimakosan moila ka·enga ong·ja indiba manderangni mi a·palrang aro samtangtango ong·telaigiparang sam-bolrang aro do·o-matrangnaba nangchakeaniko ra·baenga ine Pariat matnangataha.