Ia a·selni bidingo magisterial inquiry-ko dakchina DC ge·eta
TURA: Saenggipa bi·sa saksako Tura-ni hospital damgnion ra·chakna jechakani ja·man, ia bi·sa siangna nangaha ine matnangahani gimin ia hospital-rangni kosako rakgipa ja·kurangko de·china South Garo Hills a·jani social activist Greneth M Sangma, West Garo Hills a·jani Deputy Commissioner-na sedoataha.
Sangma-ni parakatani gitade, sianggipa bi·sara, bilsi 11 ong·gipa Netera Sangma ong·achim aro ia a·selni bidingo ua bi·sani pagipao sing·sandiaton, ia bi·sako Tura Civil Hospital aro Holy Cross Hospital damgnion admit ka·na jechakaha ine u·iataha.
Koborko man·soani gitade, ia bi·sako rabies sabisi man·a ine chanchichipahani gimin Dadenggre CHC-oniko, nambate sanna bananiko on·na gita Tura Civil Hospital-ona watatahachim.
“Tura Civil Hospital-ona ia bi·sako ra·angon, uko ra·chakna gita jechakahani gimin ja·mano bi·sani ma·drangrang, uko Holy Cross Hospital-ona ra·angskaahachim indiba Holy Cross Hospital-oba uko ra·chakna jechakaiaha. Hospital damgnion ra·chakna jechakahani gimin ja·mano bi·sako nokona ambulance-o ra·angpilengmiting somoion ia bi·sa sina nangaha,” ine Sangma, Deputy Commissioner-na badi ka·e sedoataha.
Hospital-rango ia bi·sako admit ka·na aro sanna bananiko on·na jechakaniara, Indian Constitution-ni Article 21 ning·o Right to Life ba janggi tangna on·gimin bilko pe·ani ong·aha ineba Sangma parakataha.
Ia bilsi 11 ong·gipa bi·sani sianiko judicial ba magisterial inquiry-ko dakchina gita Deputy Commissioner-ko didiatengon, “Saenggipa bi·sako maini gimin sanna gita jechakaha, iani bidingo ia hospital damgnini kosakon inquiry-ko dakna nanga aro hospital-o kam ka·giparangni kosako rakgipa ja·kurangko de·na nanga,” ine Sangma dabiangaha.
Indake ong·engon, ia a·selni bidingo magisterial inquiry-ko dakchina gita ge·etaniko on·ataha ine Robibar salo, West Garo Hills a·jani Deputy Commissioner parakatskaaha.
Ia bi·sa, rabies sabisiko man·e siaha ine chanchichipanirang ong·katahani giminba, kakketko ma·sina man·na gita sandirokanirangko dakchina Deputy Commissioner ge·etangaha.
