AMPATI: Koch jatni Pabuni Festival ba manianiko Robibar salo, South West Garo Hills a·jani Gandhipara Chenga Benga songo ong·atangaha.
Ia Pabuni Festival-ko Meghalaya Koch Association (MKA), Meghalaya Koch Students Union (MKSU) baksa nangrime ong·ataha aro program-ko a·bachengatanio, MKA-ni president, nisanko songdoe on·angaha.
Nisanko songdoani ja·man, Koch jatni Deusi, Koch manderangna pattichina dingtangmancha pattigipa ra·rongipao bi·aniko dakangaha.
Ia chang 29-gipa Pabuni Festival-ko ong·atanio, Khadi & Village Industries Board-ni Chairman aro Rangsakona-ni MLA Subir Marak, mongsonggipa sokgipa ong·e bak ra·angaha aro unbaksana Betasing-ni MDC Sanjay Koch, Barengapara-ni MDC Pramod Koch aro dingtang dingtang dilgiparangba bak ra·angaha.
Ia Pabuni manianiara, Koch jatni Assamese New Year-ko aro bilsi gitalko rimchaksoe maniani ong·a aro ia manianio, Koch manderang, jatni ganding chindingrangko gane, Pabuni mite noko tom·chimongenba, miterangna mioniko tarigipa cha·anirangko aro churangko on·ronga.
Ia manianio songni kamalrang, olakkianirangko dakdilronga. Olakkianio songni manderang, an·tangtangko aro an·tangtangni jilla kaanirangko chel·chakchina gita kamalrangni dilanichi Chokot (chu bitchi) aro Fap (miniko tarigimin cha·ani)-ko uamangni miterangna on·ronga.
Olakkianirang matchotahaon, songni manderang, mongsongbate pante me·trarang, dingtang dingtang doka dam·anirangko doke dam·e chroke mesae ia manianiko matchotata.
