SHILLONG: Sonibar attamo, Ri Bhoi a·jani Byrnihat samba jolo donggipa NH-15 ramao, Assam-oni re·bagipa bike bolsa, truck garini ki·sango su·gake a·sel ong·enba, bike-o re·baenggipa mande sakgnian sina nangaha ine kobor on·aha.
Kobor on·ani gitade, ia a·sel ong·ani Sonibar attam 5:00 bajimango ong·aha aro ua somoio Assam-oni re·baenggipa bike bolsa, ta·rakbee re·baenba, Byrnihat samba jolo, ML-11A 1367 truck garini ki·sango chagakeaha. Ia a·sel ong·anio, bike-ni ki·sango asongenggipa mandede, a·sel ong·gipa biapon janggi galaha.
Ia bike-ko Assam a·doko donggipa Hojai-oni saksa Nikunja Boro minggipa mande salengachim aro a·sel ong·ani ja·man, ukoba sanna gita ta·raken Guwahati hospital-ona ra·angahachim indiba hospital-ona sokangon, uko siakosa ra·baaha ine hospital-ni doctor-rang parakataha.
A·sel ong·ani ja·man Byrnihat police station-ni sipairang, ua biapona re·baenba, ia a·selni bidingo sandirokanirangko dakangaha aro ja·mano sianggipa manderangni manggisiko post mortem ka·na gita Nongpoh Civil Hospital-ona watataha.
Ia a·selni bidingo police-rang, ning·tubate sandirokengkua ineba u·iataha.
