TURA: West Garo Hills-ni Phulbarioni Rajabalaona dakanggipa AMPT ramako name tarie on·jani a·sel salantio songre-songbatenggipa manderang namen neng·nikaniko man·enga ine All Meghalaya Minorities Students’ Union (AMMSU) suk ong·gijaniko parakaha.
Ia AMPT rama, a·jolo songdonggipa manderangni janggi tanganio mongsonggipa ong·a, jekon tanggitik saa-ding·aniko man·enggipa manderangko nambata sanna-bananiko on·na re·rurana jakkalbata, unbaksana school-collegerango poraigipa chadamberang, pale-sim·e cha·giparang, aro gipin gipin kamko ka·e cha·giparangna re·a-doanio jakkaltobatgipa ong·a aro dal·a-chona gimik garirangan ia gita sal-wal re·ruraa ine nikna man·a.
Ia AMPT ramako batanggimin jabri-jabongana skango tariahachim indiba rama taria chu·gimik matchotgijan skang tarigiminrangde da·on nosto ong·piltaiskaengaha aro tarigimin ramarango a·klokrang nakattaiaha, jeni a·selan songre songbatgiparangna neng·nikani on·enga, AMMSU aganaha.
Namgijagipa ba dam komiani bosturangchi ramarangko tariahani gimin tarigimin rama-sorokrang baijaha, ian manderangko cha·bokani ong·a aro songsalko namroro-silroroataniko cha·sota, unigimin iandakgipa songsalni kosako cha·boke cha·giparangko nikuake dongchajawa aro uamangni kosako Union kam ka·gen ineba AMMSU, CEC, President mikrakataha.
