Tourism-ko chu·sokgipa ong·atna pilakkon bakrime kam ka·china CM didia
SHILLONG: ‘Empowerment of Tourism Champions of Meghalaya’ program-ko Budbar salo, Ri Bhoi a·jani Umiam-o donggipa Orchid Lake-o ong·atangaha aro ia program-ko ong·atanio a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia program-ko ong·atanio a·dokni Deputy Chief Minister Prestone Tynsong, Tourism Minister Timothy D Shira, Umsning-ni MLA Celestine Lyngdoh, Mawhati-ni MLA Charles Marngar aro dingtang dingtang dilgiparangba dongpae bak ra·angaha.
Ia program-ko ong·atanio a·dokni Chief Minister Conrad K Sangma, Chief Minister Meghalaya Homestay Mission-ni ning·o namgniko ra·na gita seoka man·gipa gital manderangna sanction letter-rangko sualataha.
Chief Minister Homestay Scheme (PMEGP)-ni ning·o chu·sokanggipa manderangnaba ia program-ko ong·atanio mande ra·pilskaaniko dakangaha.
Ward’s Lake-o sripenggipa mande saksako jokatanina Tourist Buddy-rangoni saksa Teiborlang Pakma-naba ia tom·anio dingtangmancha boksisko on·e mande ra·pilskaaniko dakangaha.
Ia tom·bimonganio a·dokni Chief Minister, jinmana aganprakangengon, a·doko tourism-ko chu·sokgipa ong·atna, tourism-ni dingtang dingtang kamrangko ka·enggipa dolrang aro manderang pilakkon bakrime kamko ka·china didiangaha.
“A·dok sorkari, hotel nokgiparang, taxi chalaigiparang, restaurant nokgiparang aro dingtang dingtang kamko ka·e cha·enggipa manderang, an·tangari kamko ka·anichide tourism-ko chu·sokgipa ong·atna man·jawa indiba sorkarioni a·bachenge pilak kamko ka·enggipa manderangan bakrime kamko ka·genchimosa a·doko tourism-ko chu·sokgipa ong·atna man·gen,” ine ua aganaha.
Ia program-ko ong·ataniara, a·doko Tourism-ko tang·doatna kam ka·anio mingsa chu·sokani ong·aha ine janapatengon, a·songni tourism map-o Meghalaya a·dokkoba niksenggipa ong·atahani gimin aro a·gilsak gimikon niksengroroatenga ine Tourism Department, tourism-ni kamo bak ong·enggiparang aro jolo bading chiwale cha·enggiparangko Chief Minister mittelpilangaha.
A·doko tourism-ko tang·doatna gita sorkari, dingtang dingtang project-rangko chu·sokatna miksongenga ine janapatengon, Shillong Ropeway, Mawkdok Skywalk, Mawsynram-ni Rain Museum, Living Root Bridge Museum aro Sohra, Mandalgre baksana Siju songrango rikna miksongenggipa tourism centre-rangni gimin Chief Minister aganangaha.
Shillong Airport-ko dal·bate tarina da·o kamrangko a·bachengataha aro ia kamko ja 15-mangni gisepon matchotna ka·dongengani gimin ia airport-oni dal·kalgipa sildorengrangko bilatna man·gnok ineba Chief Minister aganaha.
Ia program-ko ong·atanio a·dokni Tourism Minister Timothy D Shira-ba jinmana aganprakangengon, re·anggipa 2025 bilsini gisepo sak lak 18-mangni gita tourist-rang a·dokona re·baaha aro ian a·doko tourism-ni dal·rorobaenganiko mesokani ong·a ine parakataha.
