AMPATI: India a·songni pilak biaprangon, ‘Jan Bhagidaari – Sabse Door, Sabse Pehle’ ine pangchakaniko done, IEC Campaign-ko ong·atengani gimin Souh West Garo Hills a·jaoba ia IEC Campaign-ni bak gita Sombar salo, awareness aro beneficiary saturation program-ko dingtang dingtang songrango ong·atangaha.
Ia IEC Campaign program-ko Baispara Community Hall-o ong·atengon, ia program-o official-rang aro dingtang dingtang department-ni manderang, songadam nokadamrango manderangni janggi tangani gadangko namdapatna gita sorkarini on·enggipa dingtang dingtang scheme-rangni bidingo, songni nokni manderangna agan-talate on·angaha.
Una agreba, Monabari songni BNRGSK Building-oba awareness program-ko ong·atangaha aro ia program-ko ong·atanioba dingtang dingtang department-ni official-rang, songadam nokadamrango namroro silroroani, an·seng baljokani, lekka pora, rongtal an·talani, janggi tangani cholrang aro songsalni namgnina sorkarini ra·gate on·gipa dingtang dingtang scheme-rangni bidingo songni manderangna agan-talate on·angaha.
Ia program-rangko ong·atanio, songni manderang, songni nokni dilgiparang, mikkango donge kam ka·enggiparang aro dingtang dingtang department-ni official-rangba bak ra·angtokaha.
Ia program-rangko ong·atanio songni manderangna ma·manti bosturangko suale on·angan baksana manderangni ma·sina nangnike sing·anirangnaba official-rang, agan-talate on·angaha.
A·songni ki·tikbrionan, mongsongbate diltubatsranggipa aro chel·batsranggipa songrangonan sorkarini on·enggipa namgnirangko sokate on·na miksonganio ia IEC Campaign-ko ong·atenga.
