AMPATI: Vegetable Development Scheme 2025-2026-ni ning·o Integrated Pest Management (IPM)-ni training program-ko Budbar salo, South West Garo Hills a·jani Betasing C&RD Block ning·o donggipa Ajonggre songo ong·atangaha.
Ia training program-ko game ge·e cha·giparangna, me·sy samjakrangko ge·anio science-ni bewalo ge·na aro jo·ongrangko champenganio, mikrakataniko on·na, South West Garo Hills District Horticulture Office-ni gita ong·atangaha.
Ia Training program-ko ong·atanio skie on·gipa official-rang, game ge·e cha·giparangna agan-talatanirangko on·angengon, jo·ongrangko siatna samrangko jakkalengon, mandena aro samtangtango ong·telagiparangna maming nangchakeani donggijagipa samrangko jakkalchina aro mai dakgipa jo·ongrang, gama ge·anirangko nosto ka·bata, uarangni gimin agan-talatanirangko on·angaha.
Ia training program-ko ong·atanio songo noko game ge·e cha·enggiparang aro scheme-ni ning·o namgniko ra·na seoka man·gipa manderang bak ra·angenba, official-rang baksa agangrike ra·na cholko man·aha.
