SHILLONG: Re·baenggipa 2027 bilsio, chang 39-gipa National Games-ko Meghalaya a·doko sokachakengani gimin ia kal·susaaniko sokachakna tarisamsoanirangko aro a·doko dingtang dingtang kal·susaanirangko namdapatna gita sorkarini jako ra·e kamrangko Sukrobar salo, ma·mongoni re·bagipa Youth Affairs & Sports-ni Union Minister of State (MoS) Raksha Khadse niangaha.
A·doko kal·susaanirangko namdapatna aro National Games-na tarisamsoanirangko nipilna gita ua, a·dokni Sports & Youth Affairs Minister Wailadmiki Shylla aro dingtang dingtang official-rang baksa tom·aniko ong·atangaha.
Ia tom·anio Union Minister, kal·susaanirangko namdapatna a·dok sorkarini ra·gatgipa scheme aro program-rang, jekai athlete development scheme, grassroot football scheme aro uandakgipa scheme-rangko niangaha.
Ia tom·anio a·dokni official-rang, Union Minister-na talatanirangko on·angengon, Meghalaya State Sports Scholarship Scheme-ni ning·o sak 900-mangni gita kal·susagiparang, sorkarini dakchakanirangko man·enga ine parakataha.
Chief Minister’s Football Mission-ni bidingo talate on·angskaengon, ia Mission-ko songadam nokadamrango donggipa dam 125 centre-rangchi chalaienga aro ia Mission-ni ning·o a·dok gimikni sak 10,000-mangni gita robol kal·gipa chadamberangna dakchake on·enga ine official-rang parakataha.
Meghalaya a·doko sokachakna sienggipa National Games aro uandakgipa dal·dalgipa kal·susaanirangna tarisamsoanirangkoba ia tom·anio Union Minister nipilangaha.
Salgro salaram jolo dal·batsranggipa football stadium ong·atna niksamsoani gnang tarienggipa Mawkhanu Football Stadium-ni giminba ia tom·anio Union Minister, official-rang baksa chanchirimangaha.
Una agreba, Umsawli Sports Complex, Umthaw-ni Slalom Course aro uandakgipa gipin kal·chakram biaprangoba ia tom·anio Union Minister nipilangaha.
Ia tom·anio, Union MoS Raksha Khadse, official-rang baksa chanchirimangengon, songadam nokadamrango kal·chakram biaprangko namdapatna nangengani gimin aro chadamberangni kal·susaanirangko namdapatanio, ma·mong aro a·dok sorkarirangni scheme-rangko chaprimna nangengani gimin aganangaha.
Ia tom·anio, Meghalaya State Olympic Association aro dingtang dingtang sports association-ni dilgiparangba dongpae bak ra·angtokaha.
