TURA: Garo Hills Autonomous District Council (GHADC)-ni gital Executive Conference Hall ba Committee Hall-ko Sukrobar salo, GHADC-ni Chief Executive Membor (CEM) Dhormonath Ch Sangma, oprake on·angaha.
Ia gital Conference Hall-ko kulie on·anganio, GHADC-ni Deputy CEM Stevie M Marak, gipin Executive Membor-rang, MDC-rang aro official-rangba dongpae bak ra·angaha.
GHADC-ni gital Executive Conference Hall-ko kuliani bidingo talate on·angengon, batanggimin somoirango, GHADC-ni Executive Committee ba membor-rang, dingtang dingtang nanganirangna chanchirimna gita tom·chakna biaprangba dongjachim ine GHADC-ni CEM talatangenba, iani giminsa ua ka·rimska Executive Membor-rang baksa chanchina nanganirangko chanchina aro tom·na gita biapko nangenga ine da·alo ia gital Conference ba Committee Hall-ko kuliaha ine parakataha.
Ia gital kuligipa Committee Hall-o skanggipa changna Executive Committee-ni tom·anikoba ong·atangjolaha aro ia tom·anio chanchirimgipa kamrangni bidingo talate on·angengon, ia tom·anio Executive Membor-rang, GHADC-na Service Rule-ko tariani, Revenue Department-ni gital system-ko ra·gatani, GHADC-ni Platinum Jubilee-ko maniani, pilak Executive Membor-rangnan personal assistant-rangko donani, MDC-rangni dormaha, Chibinang Haat aro gipin nanganirangko chanchiangaha ine GHADC-ni CEM parakataha.
