Assam-o Cabinet minister-rang ku·mikchetahaon simani bidingo agangrikaniko a·bachengtaigen: CM

SHILLONG: Assam sorkarini gital Cabinet minister-rang, ku·mikchetaniko dakahaon, Meghalaya aro Assam a·dokni gisepo, simani bidingo agangrikaniko a·bachengpiltaina man·gen ine Sukrobar salo, a·dokni Chief Minister Conrad K Sangma, an·tangni ka·dongchakenganiko parakataha.
Sukrobar salo, a·dokni Chief Minister Conrad K Sangma, a·dokni Deputy Chief Minister Sniawbhalang Dhar baksa Assam-ni Chief Minister Himanta Biswa Sarma-ko uni office chamber-o grongenba, Lapangap jolrango so·sojengjeng ong·anirangko namatna aro Assam-Meghalaya a·dok damgnini simarango tom·tomaniko ra·bana agangrikangani ja·man iako Chief Minister parakataha.
A·dok damgnini simarango, mongsongbate Lapangap jolrango so·sojengjeng ong·anirangna bang·a manderangan suk ong·tokjaenga ine janapatengon, iani giminsa Assam aro Meghalaya sorkarirang, dingtang dingtang dolrangko bak ong·ate, ia neng·nikanirangko namatna kam ka·enga ine Sangma aganaha.
Ia tom·anio a·dok damgnini dilgiparang chanchirimengon, a·dokni simarango ong·enggipa obostarangko apsan chanchirime namatna aro pangkamgipa tom·tomaniko ra·bana tik ka·grikangaha.
Ia tom·anio, Assam aro Meghalaya sorkarirangni official-rang aro District official-rangba bak ra·angaha.
Assam aro Meghalaya a·dok damgnini manderangkon tom·tomaniko rakkiangchina aro pangkamgipa cholrangko man·kujaskal ku·cholsan nangrime kam ka·china didiatengon, Assam a·doko gital sorkarini Cabinet Minister-rang ku·mikchetahaon, dolgni sorkarirang nambate agangrikna man·gen ine Chief Minister parakataha.
Lapangap jolrango, batanggimin sal somoirangonin so·sojengjeng ong·anirangko nikna man·engkua aro a·dok damgnini sorkarirang baditaba chang apsan asonge agangrikahaoba so·sojengjeng ong·aniko namatna man·kujaengani gimin songni nokni manderang jajrengtokengachim.
Ia jolrango West Jaintia Hills a·jani manderang, gama ge·anirango champengatako man·e, janggi tanganio neng·nikanirangko chagrongna nangtokenga.
Lapangap jolrango gama ge·anirangko dakna on·china aro nanga gita chel·chakanirangko on·china dabie adita salrangna skangsan songni manderang, KSU aro Jaintia Hills-ni dingtang dingtang dolrangni bakrimanichi, Shillong songjinmani Secretariat-onaba jinma re·jomangtokaha.
Lum Pynthor-o donggipa Assam Police-ni camp-ko apjitatchina aro ia jolrango songni manderang, jakgitele gama ge·anirangko dakna man·na gita Meghalaya a·dokni sipai dolrangko donatchina gitaba songni manderang dabiangtokaha.