Chokpot-o Fire & Emergency Service-ko kuliningjaenganina NGO-rang sing·doa

TURA: South Garo Hills a·jani Chokpot Civil Sub-Division-o Fire & Emergency Service (F&ES) station-ko kulina gita 2025 bilsion sorkari sanction ka·ahaoba, da·alonan ia station-ko kulikujaengani gimin Chokpot jolni bakrimgimin NGO-rang, sorkariko sing·doataha.
Chokpot jolrango donggipa manderangna F&ES station-ko nangchongmotenga ine ia station-ko ta·raken kulichina gitaba NGO-rang, a·dok sorkariko didiataha.
Chokpot Civil Sub-Division ning·o F&ES station-ko kulina tik ka·gimin biapko nieani ja·man kobor ra·timgipa manderang baksa agangrikengon, iani bidingo uamang dingtang dingtang official-rango sing·sandienba, ia biapo F&ES station-ko kulina re·anggipa 2025 bilsion sorkari sanction ka·aha ine ma·sina man·aha ine NGO-rang parakataha.
Chokpot jolo F&ES station-ko kulina sorkarini sanction ka·ani bidingo koborko man·soani bakan uamang, ia jolo station-ko kulina gita jolo songdongenggipa manderang aro dingtang dingtang department-ni official-rang baksa tom·e chanchirimangaha ineba NGO-rang parakataha.
Chokpot jolo F&ES station-ko kulina nangengani gimin janape uamang, Western Range-ni police official-rangna memorandum-koba on·aha ine janapatengon, dingtang dingtang official-rang baksa chanchirimenba, uamang F&ES station-na namgipa biapkoba man·e on·na man·aha ine NGO-rang parakataha.
NGO-rangni parakatani gitade, F&ES station-na manderangni seoke on·gipa Chokpotgre-o chirang banrongani gimin ia biapko sorkari official-rang jegalaha aro uni ja·man Dobogre songo tik ka·gimin biapkoba apsan daken sorkari official-rang jegalaha. Iani ja·man jolni manderang, Warima aro gipin biaprangkoba F&ES station-na minge on·ahachim indiba ia biaprangara, mongsonggipa Chokpot bazar-oni chel·skaani gimin ia biaprangkoba sorkari jegalaha NGO-rang parakataha.
Ja·mano, songni manderang aro sorkari official-rang baksa apsan chanchirimenba NGO-rang, Chokpot bazar-oni sepango donggipa Bibragre-o biap damsako tik ka·e on·aha aro Bibragre songni Nokmaba, ia jolrangna F&ES-ni nangchongmotengako ma·sie, a·ako on·gilna gita ku·rachakaha ine NGO-rang parakataha.
“Ia biap F&ES station-na namchongmota aro ia songo, F&ES office-na aro kam ka·giparangni quarter-rangnaba chu·onga gitan biaprang donga,” ine Chokpot jolo bakrimgimin NGO-rangni dilgiparang parakataha.
NGO-rangni parakatani gitade, ia biapko F&ES-ni official-rang ra·chakahaoba, songona dakanggipa rama apchonani gimin fire brigade aro tanker-rang, re·ruraanio neng·nikanirangko man·skagen ine kenchakanirang ong·katahani gimin ja·mano uamang, songni manderang aro a·a nokgiparang baksa chanchirimon, a·a nokgiparang aro songni manderangba, ramako apalbatatna gita an·tangtangni a·arangko on·na tik ka·angaha.
Uandaken a·arangko toani aro lekkani kamrang matchotani ja·man NGO-rang, pilak nanga lekkarangko Western Range-ni official-rangna on·aha indiba da·onan ia kamko a·bachengchipgija dongenga ine Chokpot NGO-rang matnangataha.
Indake ong·engon, iani bidingo an·tangan kamrangko nirokatchina Chokpot NGO-rang, a·dokni Chief Minister Conrad K Sangma-ko didiataha aro kamrangko ta·raken a·bachengatchina mol·molataha.