TURA: Garo Hills Autonomous District Council (GHADC)-ni ning·o ga·akgipa biaprango gipin jatrang jemangan license gri bading-chiwale cha·engachim, ta·rake TNT license-rangko tarie ra·china gita ru·uta somoi salrangonin u·iatmanahachim, indake mejalo Tura songjinmao dokkan dake cha·giparangoniko license-rangko sandion, license mesokna man·gijagipa dokkanrangko chiapataha. GHADC-Deputy CEM Stevie Marak, an·tangan sandiani kamrangko dakdilaha aro license grigipa dokkanrangko chipe donataha.
GHADC-ni area-o bading-chiwale cha·na gita Tribal aro Non-Tribal sakantian ‘Trading License’-ko tarina nanga aro dokkan ge·antian ‘Provisional Tax’-koba gamjringna nangani inenba batanggimin somoirango parakatahaoba, ge·etanirangko mitamrang manijahani gimin District Council-ni niamo pangchake Sombar salni bako Tura songjinmaoni saloon, cha dokkan, aro ICICI Bank-ko chipataha ine ine Marak aganaha.
Iarangna agreba Tura jilla-o ‘Professional Tax’ gamgijagipa dokkan aro ‘Trading License’ tarigija chalaienggipa dokkanrangkoba re·baenggipa somoirango am·sandienba chipatgen. Indake GHADC-ni ning·o ga·akgipa gimikonikon sandianirangko dakanggen aro license gri dokkan dakgiparangko aro kajina gamgija chalaienggipa pilak dokkanrangko chipe donatgen, unigisepon uarangko pangnajol chipkamna nangaignok inede ong·ja, indiba nanggipa lekkarangko mesokna man·jokode dokkanrangko kulipilna on·gen ine Dy CEM talataha.
Sixth Schedule area-o bading-chiwale cha·aniko a·bachengatna am·engon sakanti songdonggipa mongsongbate ‘Non-Tribal’-rang Trading License for Non Tribals (TNT)-ko tarichengesa bading-chiwalaniko dakna niam dongoba TNT tarina gisik nangjaha jenan uamangni dokkan-rangko ia somoio songjinmaoniko aro Garo Hills-ni gipin biaprangonikoba ka·sinsin dake am·sandina a·bachengatengaha ine taldapataha. GHADC-ni ge·etgimin TNT license donggija bading-chiwale cha·enggiparangna agreba dal·a-chona contractor-rangna mikrakataniko on·angskaengon a·bachengo TNT-ko chongipa dokkanrangna mangmangsan tarie ka·sinsin dake dokkanrangko dal·dapatroroe bang·gija kajinarangko gamna challaki dakgiparang dokkan dal·a-chonani kri kajinako District Council-na gamna nanggen ine mikrakataha.
Iandake bading-chiwale cha·enggiparangni District Council-na kajina gamna gsik nangjani a·sel GHADC ru·uta somoirangonin kam ka·giparangna ja·anti dormaha on·na man·ja baksana dingtang dingtang neng·nikaniko chagrongrongna nangenga, unigimin mikkang salrango Garo Hills-ni a·gimik biaprangonikon niamgri bading-chiwalgiparangko am·sandianggen ineba mikrakataha.
Unbaksana Garo Hills-ni je biapoba ong·chon, dal·a-chona dokkanrang, Private School, Bank, aro gipinrangkoba Trading License donggija challaina man·jawa, pilakan niamko ja·rikna nanggen Dy. CEM Stevie Marak talatangaha.
