SHILLONG: Meghalaya Democratic Alliance (MDA)-ni seokgipa candidate James PK Sangma, Sombar salo Meghalaya-ni ge·samangmang donggipa Rajya Sabha seat-o chakatna gita nomination file ka·angaha. Bilo donggipa sorkari aro bakrimgipa dolrang, Parliament-ni Upper House-o James Sangma-ko jinmaan namnike ra·chakanggen ine ka·dongenga.
Sangma, Sombar salo Meghalaya Legislative Assembly Secretariat-o Chief Minister Conrad Sangma, Cabinet minister-rang, legilator aro MDA-ni dilgiparangni dongpaanio Assembly Secretary aro Returning Officer Malthus A Sangma-na uni nomination lekkako on·aha.
Sombar salon nomination file ka·ani bon·kamgipa sal ong·a, aro James-na agre darang gipin candidate, chakatgipa ba susagipa dongjani gimin Sangma-kon Rajya Sabha-o jinma namnike ra·chakenba seokgen ine ka·dongenga. June 18 tariko election-ko ong·atgen.
MDA-ni seokgipa candidate-kon bakrimgipa dolrang gimikan namnikpaaha.
Uandake nomination file ka·angani ja·man kobor ra·timgiparang baksa agangikmitingo James Sangma, Meghalaya-ni pilak manderangko aro MDA-ni dilgiparangko uo bebera·e Rajya Sabha seat-ona watatani gimin mittelangaha.
“Skanggipa anga Meghalaya a·dokni pilak manderangkon mittelchengna sika uni ja·man an·chingni Chief Minister Conrad K Sangma, Deputy Chief Ministers, ministers, MLA-rang aro bakrimgipa dolrang jekai UDP, HSPDP unbaksana Independents gimikkon gisik ka·tong gimikchi mittela” ine James aganaha.
MDA-ni angko Rajya Saba seat-na seokanina anga bilongen rasong man·a unbaksana ian dal·begipa daito ong·a ine agankuaha.
“Da·alo nomination file ka·ako matchotaha, mikkangchi Rajya Sabha seat-na seokako nichakenga. Seokman·ahaode Rajya Sabha-ni Member of Parliament-ni dal·begipa daito angni pakreona sokbagen. Jeba ong·china anga an·tangni daitoko jako ra·e kam ka·anggen aro a·doko chagrongenggipa dingtang dingtang mamlarangko Parliament-ona ra·anggen ine aganaha.
Iarangni gisepon Rajya Sabha seat-na candidate-ko seokanio MDA-o bakrimgipa dolrangni gisepo meligrikgijanirang nakatani gimin jangengani gimin sing·aon James, iako kakket ong·ja, jinma apsan tom·dake chanchirima ja·man namnike ra·chakaha ine aganaha.
Uandake Rajya Sabha-o seoka man·ahaode a·dokni politics-oni chel·e donggnokma ine sing·anina, James indine aganchakaha, “seoka man·genchimoba chu·gimik bilsidokni term-ko matchote kam ka·na chanchie dongenga.”
