TURA: Garo Hills-ni Council of Nokmas ba Nokma Council-sa Panchayati Advancement Index (PAI)-ko dakna No Objection Certficate (NOC)-ko on·aha ine adita salrangna skang, Garo Hills-o gital dake songpiltaigipa Nokma Sani Union-ni songbadrango matnange seataniko Mongolbar salo, Nokma Council raken jegalatskaenba, iani bidingo talatanikoba on·ataha.
“Garo Hills-o PAI-na Nokma Council-na NOC-ko on·aha ine Nokma Sani Union-ni secretary-ni songbad-o matnange seataniko chinga raken jegalenga maina 2025 bilsini September 17 tariko pilak Nokmarangan Tura-ni SMELC building-o tom·e ‘Panchayati Advancement Index’ ingipa kattarangko ra·chakna man·jawa ine jinma ku·mongtokaha. Uandaken, bimingko Nokma A·king ba Nokma Council Advancement Index ine mingjitna man·ode nambegenchim ine government-na chinga seataha maina Panchayati Raj-ni niamrangko Meghalaya a·dok, Sixth Schedule-ni ning·o jakkalna man·ja ine u·iatgimin donga. Iani bidingo C&RD department, bimingko mingjitna man·genma ine gipin department-rangna seachi sing·anirangko dakaha aro department ge·sade man·aba donga ine sechakatjok. Iani bidingode C&RD department-sa ma·mong sorkari baksa agangrikanggen,” ine Nokma Council-ni general secretary parakatenba, mamingkoba ma·sichenggija songbadrango jinmana tol·e aganatako tom·bagipa Nokmarang gimikan namniktokjaha ine Nokma Sani Union-ni secretary-ko matnangataha.
Je Nokmarangan, Nokma Sani Union-o bak ra·engachim, uamangko Nokma Council-o member ong·aoniko biming den·galchina aro Nokma Council office-oni on·atgipa letter pad-rang, seal-rang aro a·wil receipt-rangkoba Nokma Council-na on·pilchina gita Nokma Council-ni secretary u·iataha.
