TURA: Game ge·e cha·giparangna, an·tangtangni game ge·e man·gipa bosturangko chel·chakani, jo·ong aro sabisirangko name nirokani aro gama ge·anirango gital kolrangko jakkalani bidingo u·iatna aro talate on·na gita June 1 tarikoni 30 tarikona Agriculture & Farmers Welfare Ministry-ni ong·atenggipa ‘Khet Bachao Abhiyan’ campaign-ni bak gita Mongolbar salo, West Garo Hills a·jani ICAR-KVK, dingtangmancha Awareness program-ko Gambegre C&RD Block-ni Makalpara songo ong·atangaha.
Ia ‘Khet Bachao Abhiyan’ campaign-ko Union Agriculture Minister Shivraj Singh Chouhan-ni dilanichi a·songni pilak biaprangon ong·atenga aro ia program-ko samrangko jakkale gama ge·anirangko bon·ate, ong·telaigipa a·salrangchi gama ge·anirangko dakna ong·atenga.
Ia awareness program-ko ong·atanio, songo noko game ge·e cha·giparang bang·en bak ra·angtokaha.
Gama ge·anio gital kol ba ostrorangko jakkalchina didina gita ia program-ko ong·atanio, me·su bitchilrangkoba, game ge·e cha·giparangna suale on·angjolaha.
