URA: Garo Hills-o Nokmarangni a·arangko nirok sandianio, samtangtango ong·telaigiparangko chel·chakanio aro jatni daka rikanirangko ripinge rakkianio chagrongna nangenggipa neng·nikanirangko namatna aro iandakgipa kamrango Nokmarangni daka rikanirangko see rakkina gita re·anggipa June-ni 15 tarik Sombar salo, Nokma Council, Netherlands a·songni Leiden University-ni ning·o donggipa Futuring Heritage Research Project baksa songgigrikanio soi ka·grikangaha. Ia soi ka·grikaniko Nokma Council, Tura-ni Balading ramao donggipa Nokma Council office-o Leiden University-ni official-rang baksa dakangaha.
Ia songgigrikanio Nokma Council aro Leiden University, jatko dilenggiparangni gisepo meli-nangrimaniko ra·baan baksana Nokmarangni nanganirango, a·songko aro jatko dilenggipa manderangni knachakna man·aniko ra·bana miksonge ja·kuko de·aha.
Ia Nokma Council-ara, Garo Hills gimiko donggipa dam 1500-na batgipa a·kingrangko nirokenggipa Nokmarangni bimang ong·a aro ian jatni daka rikanio pangchake Nokmarangna on·gimin bil aro niam retirangko chel·chakanggipa bimangba ong·a.
Songgigrikanio Nokma Council-ni chairman Wenison Marak aro Leiden University-ni ning·o donggipa Futuring Heritage Research Project-ni Principal Investigator Dr Erik de Maaker, soi ka·grikangaha.
