TURA: Budbar salo, Meghalaya sorkarini Arts & Culture Department, dingtangmancha Traditional Musical Instruments ba A·chikrangni doka dam·aniko skie on·na gita Workshop-ko Asanang kal·chakramo ong·atangaha.
Ia workshop-ko a·bachengatanio, Meghalaya Legislative Assembly-ni Speaker Thomas A Sangma, mongsonggipa sokgipa ong·e bak ra·angaha aro unbaksana West Garo Hills a·jani Additional Deputy Commissioner Mary Lisa K Marak-ba dongpae bak ra·angaha.
Ia workshop-ko a·bachengate on·anganio Meghalaya Assembly-ni Speaker, jinmana aganprakengon, jatni daka rikaniko ripinganio doka dam·ani aro chrokanio mongsonggipa ong·ani gimin aganangaha. Jatni ring·ani aro chrokanirangan, A·chik pagitcham ma·gitchamrangni janggi tangani aro daka rikanirangko mesokani ong·a ineba ua aganaha. Ia sal somoirango bang·bata chadamberangan, western music ba gipin a·songrango tarigipa gital chasongni gitrangkosa namnikbata aro ring·na ba dokna dam·naba namnikbatani a·selan jatni doka dam·anirangkode ma·sitokjaha aro gamchatanikon ma·sijaha ineba Sangma aganaha.
Jatni daka rikanirangko ripinge rakkina nangengani gimin janapangengon, jatni daka rikanirango rasong chagiparang ong·china aro samtangtango ong·telaigiparangkosan ong·aigija jatni daka rikanirangko ripinge rakkiangkuna gita kam ka·china Assembly Speaker, ia workshop-o skie ra·enggipa chadamberangko didiangaha.
Ia program-ko ong·atanio West Garo Hills-ni ADC Mary Lisa K Marak-ba jinmana aganprakengon, chadamberangna jatni daka rikani baksana doka dam·ani, ring·ani aro chrokanirangko skie on·skana nangengani gimin aganangaha.
Inaugural session matchotani ja·man, doka dam·ani bosturangko tariani aro doka dam·ani bidingo dingtangmancha, changgipa sapgipa manderangchi, agan-skie aro dakmesoke mesokangaha.
A·chikrangni doka dam·aniko skie on·na Asanang-o Workshop-ko ong·ata
Date:
Share post:
