CHOKPOT: Game ge·e cha·giparangna, an·tangtangni game ge·e man·gipa bosturangko chel·chakani, jo·ong aro sabisirangko name nirokani aro gama ge·anirango gital kolrangko jakkalani bidingo u·iatna aro talate on·na gita June 1 tarikoni 30 tarikona Agriculture & Farmers Welfare Ministry-ni ong·atenggipa ‘Khet Bachao Abhiyan’ campaign-ni bak gita Bristibar salo salo, South Garo Hills a·jani CAU-KVK, dingtangmancha Awareness program-ko Seminagre aro Dapgre songrango ong·atangaha aro ia program-ko ong·atanio song damgnioni, sak 455-mangni gita game ge·e cha·giparang bak ra·angtokaha.
Ia program-ko South Garo Hills CAU-KVK-ni Subject Matter Specialist (Agronomy) Rike Chelchak A Sangma-ni dilanichi ong·ataha aro ia program-ko ong·atanio, Agriculture Development Officer Ascanio N Marak, Horticulture Development Officer Mishael R Marak, Chokpot Block-ni Agriculture Technology Manager Kenyrocks Ch Marak aro gipinrang, game ge·e cha·giparangna agan-talatanirangko on·angaha.
Ia ‘Khet Bachao Abhiyan’ campaign-ko game ge·e cha·giparangna, an·tangtangni game ge·e man·gipa bosturangko chel·chakani, jo·ong aro sabisirangko name nirokani aro gama ge·anirango gital kolrangko jakkalani bidingo game ge·e cha·giparangna u·iatna aro talate on·na gita ong·atenga.
Da·o dipet South Garo Hills a·jao ia Khet Bachao Abhiyan campaign-ko ong·atanio, a·ja gimikoni sak 3,405 manderang bak ra·e, gama ge·ani aro samrangko jakkalani bidingo skie ra·na cholrangko man·engaha.
Game ge·e cha·giparangna technology ba gital kolrangko jakkalani bidingo talbate ma·siate on·na miksonganio, dingtangmancha A·chikkuchi segimin lekkarangkoba ia program-o CAU-KVK-ni official-rang, suale on·angaha.
