TURA: North Eastern Hill University (NEHU) Tura Campus-o Tura Campus Staff Welfare Associaton (TCSWA)-ni dabianirangko chu·sokate on·jaengani gimin kamrangko ka·gija jingjengatani da·o antigni gapaha indiba da·onan uamangni dabianirangko chu·sokate on·ani bidingo maming ku·rachakanirangko on·kujaengani gimin jingjengataniko dontongkujaenga.
NEHU Tura Campus-o kam ka·enggiparangnaba, gipinrang gitan apsan kamna apsan dormahako ba Equal Pay for Equal Work-ko on·na gita Department of Personnel & Training (DOPT)-ni order-ko ra·gatchina dabie, TCSWA-ni member-rang, re·anggipa June 16 tarikonin, kamrangko ka·gija jingjengatna a·bachengatahachim.
“DOPT-ni order-ko ja·rikanichi, apsan dormahako on·pachina gita ru·uta bilsirangonin NEHU-ko chalaienggiparango dabiengachim indiba NEHU-ko chalaienggiparang, chingni mol·molanirangko knachakna gisiko nangjaenga. DOPT-ni order-ara India sorkarini ge·etanisa ong·a indiba ia ge·etaniko NEHU ja·rikjaenga. Ian ma·mong sorkarini ge·etaniko manijasa ga·akenga aro iako chinga raken jegala,” ine TCSWA-ni president Tangseng G Momin parakataha.
Momin-ni parakatani gitade, subcontract-o kam ka·enggipa mitam manderangnade EPF-rangkoba on·jaenga aro mitam kam ka·giparangkode, tangka paisani gita neng·nikanirangko pa·sike, kamrangkoba ra·ongalaha.
“Tangka paisa donggijaniko pa·sike mikkang niteaniko mesokna man·jawa ine High Court-onin ge·etani donga indiba kamoni neng·takanggipa mitam manderangnade, kamoni neng·takangaoni sal 30-ni gisepon gratuity-rangko gamna gita Gratuity Rules ba niamrang donggenchimoba gratuity-rangko on·chipkuja. Kam ka·giparangni dabianirangko Tura Campus-ko chalaienggiparang, chu·sokatna gisik nangteljaengasa,” ine Momin aganaha.
Kam ka·giparangni dabianirangko chu·sokate on·na jotton ka·ani pal NEHU Tura Campus-ko chalaienggiparang, kamrangko subcontract on·e, uamangni jingjengatanirangko bilgriatnasa jotton ka·skaenga ineba TCSWA-ni president matnangataha.
Kam ka·giparangna EPF-ni namgnirangko on·na jechakeba Civil Defense Administration, kam ka·gipa mande sakgittamna show cause notice-ko on·aha ineba TCSWA matnangataha.
Civil Defense Administration-ba outsourcing agency dake kam ka·na bil man·aiama ine sing·doatengon, uamang bil man·aia ong·ode kam ka·giparangni EPF-rangkoba on·skana nanga ine TCSWA dabiangaha.
