VPP MDC-rangko tangka paisarangchi ropna jotton ka·a ine matnanga
SHILLONG: Khasi Hills Autonomous District Council (KHADC)-o Executive Committee (EC)-ko rikchengaonin opposition party-rang, Voice of the People’s Party (VPP)-ko ra·galna jotton ka·enga aro 2028 bilsini Assembly election-na skang party-ko bilgriatna jotton ka·enga ine VPP-ni president aro Nongkrem MLA Ardent Miller Basaiawmoit a·kangataha.
Adita salrangna skang, Mawkyrwat-ni VPP MDC Pynkhrawborlin Kharjahrin, EC-oni kam watani ja·man VPP-ni president, ia kattarangko aganaha.
“Ian VPP-ko bilgriatna jotton ka·anisa ong·enga aro uamang (opposition), VPP-ko bilriatna gita chal mingantikon jakkalenga,” ine Basaiawmoit aganaha.
VPP president-ni aganani gitade, VPP-ko KHADC-ni EC-oniko ra·galna man·a ong·ode, 2028 bilsini Assembly election-na skang party-ko bilgriatna man·gen ine opposition party-rang, rakbee kamrangko ka·enga.
VPP-ni MDC-rangko tangka paisarangchi ‘ropna’ jotton ka·anirangba donga ine matnangatskaengon, ia MDC-rang, an·tangtangni manderangna kakket aro bebeo dangdike on·na miksonganiosa election-o susaahani gimin, tangka paisarangchi ‘ropna’ jotton ka·akoba jechaktokaiaha ine Basaiawmoit parakataha.
“Party-ni MDC-rang, manderangna kakket aro bebeo dangdike on·na gita party-ni bebera·anio pangchakesa VPP-o napaha aro iani giminsa manderang, uamangko seokahani gimin MDC-rang, manderangni uamango ka·donganiko ra·ongalna nangnikjaha,” ine Basaiawmoit aganaha.
VPP-de gipin political party-rang gita kamko ka·gipa dol ong·ja ine janapatskaengon, gipin political party-rangde da·oba gitcham politics-kon ja·rike dongkuengani gimin party-ni member saksa kam waton, ua mandeni kosako ong·gija chanchina a·bachenga indiba VPP-de, member-rangni kam watani a·selrangko name sandiesa ja·kurangko de·a ine VPP president parakataha.
Indake ong·engon, VPP-ni gisepo meligrikgijanirang ong·katenga ine opposition dolrangni jangbingbangatanirangko talate on·na gita adita salrangna skangsan KHADC-ni pilak MDC-rangan, party-ni gipin member-rang baksa tom·aniko ong·atangaha ine Basaiawmoit parakataha.
“Sak 18 MDC-rangan party baksa ong·angkuna ku·rachaktokaha aro chinga pangna ka·rong bewal gitan kamrangko ka·engkua,” ine ua aganaha.
