A·dok sorkari baksa nangrime kamko ka·na gital Rajya Sabha MP ku·rachaka

SHILLONG: Meghalaya a·dokni aro salgro salaram jol gimikni nanganirangko chu·sokatna gita gital seokako man·gipa a·dokni Rajya Sabha MP James K Sangma, a·dok sorkari baksa nangrime kamrangko ka·na ku·rachakaniko on·angaha.
Meghalaya Democratic Alliance (MDA) 2.0-ni gita una mande ra·pilskaaniko on·na dingtangmancha tom·aniko ong·atanio a·dokni gital Rajya Sabha MP, ia ku·rachakaniko on·angaha.
“Meghalaya aro salgro salaram jolni nanganirangko Rajya Sabha-o bilake ku·rang on·na gita anga a·dok sorkari baksa nangrime kamko ka·na ku·rachakenga,” ine Sangma aganaha.
An·tangko Rajya Sabha MP-na seokahani gimin ua dingtangmancha MDA 2.0-ni pilak member-rangkoba mittelpilangaha.
James Sangma-na mande ra·pilskaaniko dakna gita tom·aniko ong·atanio, BJP-ni MLA sakgni, chong·motan AL Hek aro Sanbor Shullai, UDP-ni president aro Cabinet Minister Metbah Lyngdoh, NPP, UDP, HSPDP-ni MLA-rang, Assembly-ni Speaker Thomas A Sangma aro MDA-ni gipin member-rangba dongpae bak ra·angaha.
Tom·a matchotani ja·man a·dokni Chief Minister Conrad K Sangma-ba kobor ra·timgipa manderang baksa agangrikengon, MDA-ni tom·aniko ong·ataniara, manderangni nangchongmotgipa kamrangni gimin, talatanirangko ra·na aro an·tangtangni chanchianirangko aganna cholko on·ani gita ong·aha ine parakataha.
Iandakgipa tom·anirangko ong·ataniara, nangrimgimin dolrangni bakrimaniko mangrakbatatna aro ma·sichakgrikna dakchakaniko on·a ineba ua aganaha.
Rajya Sabha-ni gital MP-na an·tangni namgipa skaniko on·angengon, ua Rajya Sabha-o a·dokni nanganirangko bilaken ku·rang on·na man·gen ine Chief Minister, an·tangni ka·dongchakenganiko parakangaha.
Sorkariko chalaiani bidingo sing·anirangna aganchakaniko on·angengon, darang sorkarian walsanode a·dokni nangani aro neng·nikanirangko namatna man·jawa indiba MDA 2.0 sorkari, ru·uta bilsirangna matchotgija dongenggipa mitam kamrangkode matchotatna man·aha ine Chief Minister aganaha.
A·doko namroro silroroaniko ra·bana gita NPP-chi dilenggipa MDA 2.0 sorkari, rakbee kamrangko ka·angkugen ineba Sangma, ku·rachakaniko on·angaha