RONGJENG: East Garo Hills a·jani Bolmoram A·dinggre songo, bilsibrini ja·man bijoliko on·piltaina man·aha ine kobor on·aha.
Kobor on·timgiparangni u·iatani gitade, Bolmoram A·dinggre songo, transformer nosto ong·a intalan, ia songni dol 30-40-mangni gita nokdangrang, bijoli gri ong·e dongna nangaha aro iani a·sel songni manderang, neng·nikanirangko chagrongna nangtokahachim.
Ia songara, Nongalbibra circle-ni ning·o ga·akgipa song ong·a aro ia songna bijoli on·ani kamko a·dok sorkari, FEDCO-na on·ahachim.
Ia songo transformer nosto ong·ahani gimin songni manderang, changni chang FEDCO-ni official-rangna u·iatahaoba, nosto ong·gipa transformer-ko uamang teksree on·chipjaha aro uandaken songni manderang, bilsibrimangna kingking, bijoli gri ong·e dongna nangtokaha.
Indake ong·genchimoba, Nongalbibra jolrangna bijoli on·ani kamko SAI Computers Limited company jako ra·a intalan, kamrang dingtangbana a·bachengaha ine songni manderang parakataha.
“Ia songo transformer nosto ong·aha ine songni manderang u·iataha aro u·iatako man·soa bakan company-ni manderang, transformer-ko nina re·angaha. Uni ja·man ta·raken transformer-ko teksree on·na man·aha aro ia songna bijolko on·piltaina man·aha,” ine SAI Computers-ni official saksa parakataha.
Bilsibrina bijoli gri ong·e dongani ja·man, ia songna June 19 tarik dipet bijoliko on·piltaina man·aha ineba official-rang parakataha.
Bijoliko man·piltaie on·ahani gimin Bolmoram A·dinggre songni manderangba, SAI Computers Ltd-ko mittelpilangtokaha.
