SHILLONG: Meghalaya a·doko dingtang dingtang political party-rang, Bharatiya Janata Party (BJP)-ko Hindu party ine manderangko dilsretna jotton ka·e, party-ni dal·roroaniko champengenga ine Sukrobar salo, BJP Meghalaya-na ku·wattimgipa M Kharkrang matnangataha.
Meghalaya a·dokni Assembly election-rango BJP, party-ko mangrakbatatna krenge kamrangko ka·engoba da·onan South Shillong aro Pynthorumkhrah Assembly constituency damgnikosan chena man·aiengkua ine sing·anina ua iako aganchakaha. Iani bidingo kobor ra·timgipa manderang baksa agangrikengon, election-na campaign ka·engmiting somoirango bang·a political party-rangan, toromni gita manderangko dilsretna jotton ka·anichi, Meghalaya a·doko BJP-ko dal·rorona on·jaenga ine Kharkrang parakataha.
Namroro silroroani kamrangode BJP-ko matnangna gita maming cholrang dongjae, election changantian opposition party-rang BJP-ko Hindu party ine manderangko dilsretronga ineba ua aganaha. Indake ong·genchimoba da·o manderang, BJP-ni kosako matnanganiranga ‘politics-ni gita kal·anisan’ ong·a ine ma·sina a·bachengtokengaha ineba Kharkrang parakataha.BJP-chi dilenggipa ma·mong sorkarini a·bachengatgipa namroro silroroani kamrangko darangnaba mikkang niteani grian songsalni pilak manderangnan sokatenga ineba ua aganaha.BJP-ko dilenggiparang, pangnan Kristianrangni nanganirangko niatrongaia ineba Kharkrang parakataha.
