RESUBELPARA: Meghalaya a·doko electoral roll-rangko Special Intensive Revision (SIR) ka·na a·bachengatahaon, mijal Mongolbar sal dipet a·dokni pilak biaprangon Booth Level Officer (BLO)-rang, ia SIR-ni bak gita nokantichi re·e, self-enumeration form-rangko sualna gita a·bachengataha.
North Garo Hills a·jaoba BLO-rang, Mendipathar, Salpara aro Dekachang jolrango donggipa nokdangrangona re·e, electoral roll-rangko nipilna a·bachengaha aro ia nokdangrangona re·anganio BLO-rang, form-rangko suale on·angan baksana SIR-ko dakani giminba agan-talatanirangko on·angjolaha.
Ia Special Intensive Revision-ko dakani bidingo talatanirangko on·angengon, maini gimin electoral roll-rangko nipilenga, basako draft electoral roll-rangko chapa ka·gen, basakoni basakona a·kangani aro jegalanirangko dakna man·gen, uarangni giminba BLO-rang, nokdang ge·antinan agan-talatanirangko on·angaha.
Special Intensive Revision-na qualifying date-ara October-ni 1 tarik ong·gen, Draft electoral roll-rangko August-ni 5 tariko chapa ka·gen aro bon·kamgipa electoral roll-rangko October-ni 7 tariko chapa ka·gen ineba BLO-rang, nokdang ge·antinan agan-talate on·angaha.
Electoral roll-rangko nipilna gita nokantichi re·anganio BLO-rang baksa bakrimchina gitaba District Administration, North Garo Hills a·jao songdongenggipa manderangko didiataha.
