AMPATI: South West Garo Hills a·jao Kerupara Integrated Village Cooperative Society (IVCS) Limited-ni skanggipa Cooperative Retail Outlet ba dokkanko Bristibar salo, Ampati Bazar-o kuliaha aro ian Ampati-o dokkanko kulichenggipa IVCS-ba ong·aha.
Ia retail outlet ba dokkano Kerupara IVCS Ltd-ni tarigipa ma·manti bosturang, jekai Orange Juice, Orange Jam, Amla Juice, Amla Candy, Ginger Juice, Ginger Candy, Tamarind Juice, Mosombi juice, Lemon Juice, Chambil achar, mango juice, pineapple juice, pineapple jam aro uandakgipa dingtang dingtang bosturangko palenga.
Kerupara IVCS Ltd-ko 2019 bilsini September 29 tariko kuliaha aro ia IVCS-ko kulichengaonin songni manderang, ku·cholsan kamrangko ka·e, songni manderangna aro songsul noksulrangnaba namgnirangko on·na man·enga.
2023 bilsio Kerupara IVCS, cashewnut, gue aro dingtang dingtang bolam biterangoniko dingtang dingtang bosturang, jekai juice, jam, achar aro uandakgipa bosturangko tarina a·bachengaha aro uandaken da·o ia IVCS, Ampati-o dokkanko kulie, an·tangtangni tarigipakosan ong·aigija songo noko tarigipa bosturangkoba breskae, ia dokkano palna sim·na gita a·bachengataha.
