TURA: Meghalaya a·doko lekka porani kamrangko namdapatchina gita didie Sombar salo, Meghalaya Pradesh Youth Congress (MPYC), a·dokni Chief Minister Conrad K Sangma-na sedoataha.
Meghalaya a·dokni Performance Grading Index (PGI), 2024-2025 bilsio 448 ong·aoni 2025-2026 bilsio 525.71-ona tang·dokalahani gimin ra·chakangengon, NITI Aayog-ni gitalbatsranggipa report-ode a·dokni lekka porao kamrang namen ja·donggaatako man·enga ine mesokskaaha ine MPYC-ni president Timjim K Momin parakataha.
Momin-ni parakatani gitade, a·dokni dam 74 sorkari skulrango sak 152 skigiparangko kamo donatahaoba, ia skulrango biming segatgipa bi·sarang saksaba dongskaja aro dam 1414 skulrangode skigipa saksanchi, sak 49,807 chatro chatrirangna skie on·skaenga. PARAKH Rashtriya Survekshan 2024-oba Meghalaya a·dokko, mongsonggipa subject-rangon a·songni average-na bate komikuenga ine mesokaha ineba Momin parakataha.
“Iandake a·dokni lekka porako dingtang dingtang gadangrango mesokaniara, Meghalaya a·doko lekka porako ICU-o ong·kuenga ine mesokani ong·a. Uni gimin classroom-rango skie on·ani, kamtangtangko name chu·sokatani aro skia man·ani biterangko nambatatna gita a·doko lekka porani kamrangko namdapatna nangenga,” ine MPYC-ni president parakataha.
Indake ong·engon, skulrangko scientific mapping dakna, skulrango chatro chatrirang dongani kri skigiparangko rakkichina, Directorate of School Education, District & Sub-Divisional Education Officer, Block Mission Coordinator, Cluster Resource Coordinator, head teacher, skigiparangni daitorangko talate on·na, skigiparang kamtangtangna gisik on·na man·na gita gipin kamrangko komiatchina, classroom-rangko nangani kri rikdape on·china, somoi gita textbook-rangko sualchina aro uandakgipa ku·pattianirangko MPYC, a·dokni Chief Minister-na on·ataha.
