Manderangna dangdike on·aniko namdapatna gital technology-ko jakkalchina Union MoS didia
SHILLONG: India sorkarini Personnel, Public Grievances and Pensions Ministry-ni ning·o Department of Administrative Reforms and Public Grievances (DARPG)-ni Meghalaya sorkari baksa salgnina ong·atenggipa NEXTGEN Administrative & E-Gov Reforms-ni national conference-ko Sombar salo, Union Minister of State (MoS) Dr Jitendra Singh, a·bachengate on·angaha aro ia conference-ko a·bachengatanio, Meghalaya a·dokni Chief Minister Conrad K Sangma, Chief Secretary Dr Shakil Ahammad aro gipinrangba dongpae bak ra·angtokaha.
Ia national conference-ko a·bachengate on·anganio Dr Jitendra Singh, mongsonggipa sokgipa ong·e, jinmana aganprakangengon, sorkarini kamrangko namdapatanio a·dokni dilgiparang baksa ku·mong nangrime ja·kurangko de·na gita ma·mong sorkari, iandakgipa national conference-rangko ong·atna jotton ka·enga ine parakangaha.
Manderangna dangdike on·anio kamtangko namdapatna gita Artificial Intelligence (AI) gita dakgipa gital Technology ba kolrangko jakkalchina gitaba Dr Singh, sorkari official-rangko didiangaha.
Bang·a officer-rangan, kamtangtango jakchakgija ong·genchimoba, ia national conference-o bak ra·aniara, iandakgipa national conference-rangni mingnamaniko mesokani ong·enga ine janapatengon, Meghalaya a·doko New Shillong Adminisrative City-ko bikote sorkarini kamo Digital Model-ko ra·gataniara nambegipa dakmesokani ong·aha aro iako gipin a·dokrangba skie ra·na man·gen ine Dr Singh aganaha.
DARPG-ni kamrangni gimin janapangengon, ia department-ni ning·o ming lak 25-mangni gita manderangni neng·nikanirangko segataha aro manderangni neng·nikanirang bang·genchimoba gital kolrangni dakchakanichi, ia neng·nikanirangko sorkari ta·raken niatna man·enga ine Union MoS aganaha.
2021 bilsio a·bachengatgipa Swacchta Campaign-ni bidingo janapangskaengon, manderangni galgipa jabolrangoniko sorkari, bang·en kajinarangko ong·katatna man·aha ine Dr Singh parakataha.
Nambatgipa kam ka·ani bewalrangko skie ra·na nangani gimin aro sorkarini kamrangko namdapatanio dontonggija ka·angkuchina gitaba Dr Singh didiangaha.
Ia tom·bimonganio, Meghalaya a·dokni Chief Minister Conrad K Sangma-ba, jinmana aganprakengon, ia national conference-ko ong·ataniara, manderangna dangdike on·anio kamrangko namdapatna nanganiko mesokani ong·a ine aganaha.
E-Governance aro Administrative Reforms-o chagrongna nangenggipa neng·nikanirangko janapangengon, Meghalaya a·doko manderangni neng·nikanirangko aro badi ka·anirangko namatna gita a·dok sorkarini manderang baksa mikkanggrik tom·anirangko ong·atenggipa CM Connect program-ni bidingo Chief Minister, toe aganangenba, ia pilakan manderangni janggi tanganio dingtanganiko ra·bana miksonganisa ong·na nanga ine aganaha.
Gisiko namgipa chanchiani aro manderangna namako dakna skani dongna nangani giminba Chief Minister aganangaha.
